Ադրբեջանական APA լրատվական գործակալության փոխանցմամբ, ուղղումներ են արվել Բաքու-Թբիլիսի-Կարս (ԲԹԿ) երկաթգծի նախագծի իրագործման համաձայնագրում: Դրանք տեղի են ունեցել Ադրբեջանի տրանսպորտի նախարարության և վրացական պատվիրակության միջև կայացած բանակցությունների արդյունքում:
Նոր փաստաթղթի համաձայն, Ադրբեջանի կողմից նախագծի կառուցման համար տրվող գումարի չափը հասցվել է 775 միլիոն դոլարի: Լիազոր բանկի կողմից տրվելիք այս գումարը հատկացվելու է երկու եղանակով. 200 միլիոն դոլարը հատկացվելու է 25 տարով և 1 տոկոս տոկոսադրույքով, իսկ մնացած 575 միլիոն դոլարը` 25 տարով և 5 տոկոս տոկոսադրույքով:
Այս վերջին ուղղումների արդյունքում նախագծի ընդհանուր արժեքը հասցվել է 1.2 միլիարդ դոլարի` նախկին 600 միլիոն դոլարի փոխարեն:
Հիշեցնենք, որ 2007 թվականի փետրվարի 7-ին Վրաստանի մայրաքաղաքում Հայաստանի չորս հարևաններից երեքը` Վրաստանը, Ադրբեջանը և Թուրքիան, ստորագրեցին «Թբիլիսյան հռչակագիրը», որն առնչվում էր միմյանց միջև հաղորդակցային և էներգետիկ համագործակցության խորացմանը:
Այդ պայմանավորվածությամբ նախատեսվում էր կառուցել Թուրքիան (Կարս) Վրաստանին (Ախալքալաք) կապող 98 կիլոմետր ընդհանուր երկարությամբ երկաթգիծ, որից 68 կիլոմետրը՝ թուրքական տարածքում, իսկ 30 կիլոմետրը՝ վրացական տարածքում: Բացի այդ, պետք է արդիականացվեր երկաթգծի վրաց-ադրբեջանական հատվածը:
Երկաթգծի տարեկան թողունակությունը կազմելու է տարեկան 30 միլիոն տոննա բեռնափոխադրություն (Գյումրի-Կարս երկաթգծի դեպքում այդ ցուցանիշը կազմում է 10 միլիոն տոննա)։
