Բրիտանական Pink Floyd խումբը հայտարարել է վերամիավորման մասին՝ ի նշան աջակցության «Ազատության տորմիղ» պաղեստինամետ ակցիայի կին մասնակիցների, որոնց իսրայելցի զինվորականները ձերբակալել են։ Այս մասին ասվում է խմբի ֆեյսբուքյան էջում։
«Դևիդ Գիլմորը, Նիք Մեյսոնը և Ռոջեր Ուոթերսը միավորվել են «Գազայի կանանց ազատության տորմիղի» աջակցության համար և դատապարտում են նրանց անօրինական ձերբակալությունն ու կալանավորումը միջազգային ջրերում»,- ասվում է խմբի հայտարարությունում։
Հոկտեմբերի 5-ին իսրայելցի զինվորականները զավթել էին «Զեյթուն-Օլիվա» մոտորանավակը, որը շարժվում էր պաղեստինյան Գազայի ափերի ուղղությամբ՝ «Ազատության տորմիղ» ակցիայի շրջանակում։ Israel Info-ի փոխանցմամբ՝ ԱՄՆ-ից, Շվեդիայից, Ավստրալիայից և այլ երկրներից ձերբակալված 13 ակտիվիստների շարքում նավում եղել է նաև 1976 թվականի Խաղաղության Նոբելյան մրցանակի դափնեկիր, 72-ամյա իռլանդուհի Մեյրիդ Կորիգան-Մագուայրը։ Նա մրցանակ էր ստացել «Խաղաղ մարդկանց միություն» կազմակերպության ստեղծման համար, որը օգնել է վերջ դնել Հյուսիսային Իռլանդիայում արյունալի հակամարտությանը։
Նա 2010 թվականին եղել էր առաջին «ազատության տորմիղի» կազմում, ինչի համար Իսրայելը զրկել էր նրան 10 տարով երկիր մուտքի իրավունքից։
Կանանց «Ազատության տորմիղ» ակցիան անցկացվում է 2010 թվականի հակամարտությունից հետո երբ իսրայելցի զինվորականները սպանել են 9 մարդու և վիրավորել 30-ին, ոքեր փորձել են ճեղքել Գազայի հատվածի ծովային շրջափակումը։
