Աշխարհի «թիվ մեկ» ահաբեկչի գտնվելու վայրի մասին տեղեկություն հաղորդողների համար նախատեսված գումարը, որը կազմում էր 25 միլիոն դոլար, ոչ ոքի չի վճարվի: Այս մասին ABC հեռուստաալիքին է ասել ԱՄՆ բարձրաստիճան մի պաշտոնյա, որը հրաժարվել է իր անունը հրապարակելուց: Իշխանությունները կարծում են, որ Բեն Լադենին հնարավոր է դարձել ոչնչացնել էլեկտրոնային հետախուզության շնորհիվ ստացված տեղեկությունների հիման վրա:
Այս որոշումը կդադարեցնի բոլոր խոսակցություններն այն մասին, թե ով է եղել Բեն Լադենին մատնած մարդը, և ով է ստանալու 25 միլիոնը: ԱՄՆ վարչակազմում նշել են, որ այսքան տարիների ընթացքում իրենց չի հաջողվել ունենալ մի գործակալ, որը Բեն Լադենի շրջապատից տեղեկություններ կհաղորդեր, քանի որ «թիվ մեկ» ահաբեկչի մերձավորները ֆանատիկորեն հավատում էին իրենց գործին և գումարներով չէին գայթակղվում:
