«Մենք սպասում էինք, որ ինչ-որ նորություն պիտի լինի, սակայն բոլոր փոփոխությունները ուղղված են միայն մեկ բանի՝ պահպանել եղած համակարգը, և այս փոփոխությունները լիովին տեղավորվում են այդ տրամաբանության մեջ»,- «Առաջին լրատվական»- ի հետ զրույցում, անդրադառնալով կառավարության փոփոխություններին, նոր կառավարության ձևավորմանը, ասաց քաղաքագետ, Հանրային խորհրդի անդամ Սուրեն Զոլյանը:
Նրա խոսքով՝ այսօր այնպիսի իրավիճակ է, որ պարտադրված են գնալ փոփոխությունների, բայց այնպիսի փոփոխություններ են իրականացվում, որոնց արդյունքում ոչ մի բան չի փոխվում, «իմիտացիոն կամ ձևական փոփոխություններ են դրանք»:
Փոփոխությունների անհրաժեշտությունը, ըստ քաղաքագետի, գալիս է նախևառաջ իրավիճակից, որովհետև այսօր մինչև այժմ եղած մեխանիզմներն այլևս չեն գործում:
«Այսօր ֆինանսների նախարարը խոսեց շոկի մասին: Տնտեսությունը քանդվում է, և ինչ-որ մի բան պետք է փոխել, բայց ստեղծվել է մի համակարգ, որը չի ուզում փոփոխվել:
Այս նշանակումներն այնպիսին են, որ կարևոր է ոչ թե բանակի հետ կապված խնդիրների լուծումը, այլ ներկա վիճակի պահպանումը: Հայաստանում՝ պատերազմական երկրում պաշտպանության նախարարը սուպերնախարար է եղել: Վերջին տարիներին ամեն ինչ արվում է, որպեսզի պաշտպանության նախարարի կարգավիճակը չեզոքացվի, որ մեծ լծակներ չունենա:
Իշխանափոխության հնարավորությունը նախևառաջ բանակից է գալիս: Ապրիլյան դեպքերից հետո բանակն իրեն անպաշտպան զգաց: Մինչ այդ բանակը իրեն պատկերացնում էր ուղղակի հրաման կատարող, մեջքին պետությունն էր կանգած, սակայն խմորումներ եղան: Եվ այդ փոփոխությունների անհրաժեշտությունը հասունացել էր ոչ թե բանակը ուժեղացնելու, այլ բոլորովին այլ իմաստով՝ կասեցնելու այն վտանգը, որ բանակից հանկարծ չգա, պայմանականորեն ասած, կապիտան Բոնապարտ»,- նշեց Ս. Զոլյանը:
Նրա դիտարկմամբ՝ Հայաստանը, ըստ էության, արտաքին քաղաքականություն չունի: «Միգուցե Վիգեն Սարգսյանը ավելի հարմար կլիներ որպես արտաքին գործերի նախարար: Բայց նա կարող էր որոշակի ինքնուրույնություն ձևավորել, ինչից լիովին զուրկ է Էդուարդ Նալբանդյանը: Բայց մեզ մոտ շատ դեպքերում պաշտոնի նշանակում են ոչ թե ելնելով նրանից, թե ով ինչ կարող է անել, այլ հակառակը՝ ով ի վիճակի չէ ինչ-որ բան անել»,- նկատեց քաղաքագետը:
Հարցին՝ կառավարության կազմի նշանակումները, սկսած Կարեն Կարապետյանից մինչև երեվա նշանակումները, ունեն ներքին սպառմա՞ն նպատակ, թե՞ արտաքին հասցեատեր, Սուրեն Զոլյանը պատասխանեց. «Այս առումեվ ես կարծում եմ դա ավելի շատ ներքին տրամաբանության մեջ է տեղավորվում՝ ելնելով քայլերից: Եթե այսօր Կարեն Կարապետյանը խոսում է ավիատոմսերի գողության մասին, առանց ուշադրություն դարձնելու ավելի լուրջ գողություններին, կարծես թե դա ցույց է տալիս, որ նա չունի քարտ բլանշ, և նրա գործողությունները պետք է տեղավորվեն հեռուստասերիալի գեղեցիկ հերոսի տրամաբանության մեջ, որը ամեն հինգշաբթի պետք է մի նորույթ հնարի»:
Սուրեն Զոլյանի խոսքով՝ Կարեն Կարապետյանին հանրապետական դարձնելը ՀՀԿ-ի շահերից չի բխում: «Նրանց համար ավելի լավ է ունենալ տեխնոկրատ վարչապետ, որ ի վերջո հեշտ լինի նրա գլխին բամփելը»,- ընդգծեց քաղաքագետը:
Մանրամասները՝ տեսանյութում:
