Ամբողջ աշխարհում փախստականների կեսից ավելիին ընդունել են աղքատ երկրները, իսկ ավելի ուժեղ տնտեսությամբ երկրները, հակառակը, հրաժարվում են փախստականների արդար բաշխումից՝ հայտնել է Amnesty International միջազգային իրավապաշտպան կազմակերպությունը։
«Աշխարհի 193 երկրից միայն 10-ն են ապաստան տալիս բոլոր փախստականների կեսից ավելիին։ Երկրների նման փոքր թիվը պայմանավորված է նրանով, որ նրանք հարևան են ճգնաժամային երկրներին։ Նման իրավիճակն ըստ էության անկայուն է և միլիոնավոր մարդկանց մատնում է անտանելի տառապանքների, ովքեր փախչում են պատերազմից ու հետապնդումներից այնպիսի երկրներում, ինչպիսիք են Սիրիան, Հարավային Սուդանը, Աֆղանստանն ու Իրաքը»,- հայտարարել է կազմակերպության գլխավոր քարտուղար Սալիլ Շեթին։
Ներկայումս ամբողջ աշխարհում հաշվվում է 21.3 մլն փախստական։ Նրանց կեսից ավելիին ընդունող 10 երկրի մասնաբաժինը համաշխարհային ՀՆԱ-ում կազմում է 2.5 տոկոսից պակաս։ Իրավապաշտպանները կարծում են, որ փախստականների արդար բաշխումը բոլոր երկրների միջև թույլ կտա տարեկան տուն գտնել փախստականների 10 տոկոսի համար։
Ներկայումս փախստականների ամենամեծ թիվը Հորդանանում է (2,7 մլն), այնուհետև գալիս է Թուրքիան (2,5 մլն), Պակիստանը (1,6 մլն), Լիբանանը (1,5մլն), Իրանը (979 հազար), Եթովպիան (736 հազար), Քենիան (554 հազար), Ուգանդան (477 հազար), Կոնգոն (338 հազար), Չադը (369 հազար)։
«Օրինակ՝ Մեծ Բրիտանիան 2011 թվականից ընդունել է 8000-ց քիչ սիրիացիների, մինչդեռ Հորդանանը, որտեղ բնակչությունը գրեթե 10 անգամ պակաս է, և որի մասնաբաժինը համաշխարհային ՀՆԱ-ում մնում է ընդամենը 1.2 տոկոս, ընդունել է Սիրիայից ավելի քան 665 հազար փախստականի»,- ասվում է զեկույցում։
