Հայաստանի պետական ֆիլհարմոնիկ նվագախումբը (ՀՊՖՆ) հուլիսի 25-ին «Արամ Խաչատրյան» համերգասրահում կայանալիք համերգով կեզրափակի 2012-2013թթ. համերգաշրջանը: Համերգը նվիրվում է կոմպոզիտորներ Ջուզեպպե Վերդիի ու Ռիխարդ Վագների 200-ամյա հոբելյաններին, որն իր ներկայությամբ կզարդարի աշխարհահռչակ երգչուհի, սոպրանո Հասմիկ Պապյանը: Նա կկատարի նախերգանքներ ու արիաներ կոմպոզիտորներից: Այս մասին լրագրողների հետ հանդիպմանը տեղեկացրեց Հայաստանի պետական ֆիլհարմոնիկ նվագախմբի դիրիժոր Էդուարդ Թոփչյանը:
Հասմիկ Պապյանը ասաց, որ գալով Հայաստան՝ համերգներով հանդես գալու մտադրություն չի ունեցել, այլ պարզապես եկել էր հանգստանալու ընտանիքի անդամների հետ, սակայն ստանալով համագործակցության առաջարկ՝ չի կարողացել մերժել:
Երգչուհին կատակով ասաց, որ հանգստանալու փոխարեն փորձեր է անում, արդեն 3 փորձ է արել ֆիլհարմոնիկի հետ ու գոհ է արդյունքներից:
«Շատ մեծ ծրագիր է, այս 1 շաբաթում լարված փորձեր ենք անում: Սա ամիսների աշխատանք է պահանջում, սակայն հույս ունենք՝ ամեն ինչ լավ կլինի»,- ասաց նա:
Ինչ վերաբերում է Վերդիի ու Վագների ընտրությանը, ապա երգչուհին նկատեց, որ այստեղ Վագներ գրեթե չի հնչում, այնինչ Վերդի կատարվում է հաճախ: «Սա այնպիսի փիլիսոփայություն է, որ դրանից հետո այդ երաժշտության հետ առնչվելիս կյանքն իմաստավորվում է»,- անկեղծացավ Հ. Պապյանը:
Երգչուհին նկատեց, որ վերջին անգամ 22 տարի առաջ է երգել ֆիլհարմոնիկի հետ: Այն ժամանակ հանդես գալով Լորիս Ճգնավորյանի ղեկավարությամբ՝ կատարել է 3 կոնցերտային արիաներ: Հասմիկ Պապյանը նշեց, որ միշտ սիրով պատրաստ է գալ ու երգել Հայաստանում, ու հուսով է՝ կստանա առաջարկներ:
Խոսելով ՀՊՖՆ-ի հետ համագործակցության մասին՝ Հասմիկ Պապյանը նշեց, որ «վերադարձը հուզիչ է» ու իրեն «հանգիստ է զգում» փորձերի ժամանակ:
Խոսելով ՀՊՖՆ-ի ու աշխարհի մյուս հեղինակավոր նվագախմբերի մասին՝ երգչուհին նկատեց, որ մեր նվագախումբը հետ չի մնում նրանցից, թեև, իհարկե, կան ահռելի տարբերություններ՝ ինչ պայմաններում են գործում նվագախմբերը, ինչ ֆինանսական հոսքերի են տիրապետում:
Էդուարդ Թոփչյանն էլ իր խոսքում ուրախությամբ նշեց, որ ինքը երկու նվեր է ստացել՝ նախ, որ վերջապես ստացվեց համագործակցությունը երգչուհու հետ, և երկրորդ՝ որ ինքը վերջապես «առիթ ու բախտ է ունեցել» նվագել Վագներ:
Վերջինս, չցանկանալով բացել փակագծերը, նշեց, որ ՀՊՖՆ-ն առաջարկներ է արել երգչուհուն, որոնք հուսով է՝ մոտ ապագայում կիրականացնեն:
«Այնպայման ուզում ենք անել «Տոսկա»: Պետք է անենք: Ծրագրեր կան՝ ընդհուպ մինչև Վագներ»,- հավելեց դիրիժորը: