Սիրիայում մարդասիրական օգնությամբ շարասյան գնդակոծությունը «լուրջ հարված է հասցրել» երկրում հրադադարի կնքմանը: BBC-ի հաղորդմամբ՝ այս մասին երկուշաբթի լրագրողներին ասել է ԱՄՆ վարչակազմի ներկայացուցիչը:
«Այսօր տեղի ունեցածը լուրջ հարված հասցրեց Սիրիայում հրադադարի հաստատման ուղղությամբ մեր ջանքերին»,- ասել է նա:
Վաշինգտոնի վարչակազմի ներկայացուցիչը նաև նշել է, որ Ռուսաստանին «անհրաժեշտ է մտադրությունների լրջությունը ցուցադրել ոչ միայն խոսքով, այլև իր գործողություններով», որոնք ցույց կտային, որ Սիրիայում հրադադարի գործընթացը «կենսունակ է մնում»:
ԱՄՆ-ը առայժմ ստույգ չի կարող ասել՝ ով է գնդակոծել մարդասիրական օգնությամբ շարասյուները Սիրիայի Հալեպ քաղաքում:
Վաշինգտոնի վարչակազմի ներկայացուցչի խոսքով՝ ԱՄՆ-ը և Ռուսաստանը «սերտ խորհրդակցություններ» կանցկացնեն, այդ թվում՝ բարձր մակարդակով, կոնկրետ այդ գնդակոծության և ընդհանուր հրադադարի պահպանման հարցով:
Ավելի վաղ ՄԱԿ-ի գլխավոր քարտուղարի պաշտոնական ներկայացուցչի տեղակալ Ֆարհան Հակը հայտնել էր, որ Սիրիայում Հալեպի շրջան ուղարկված ՄԱԿ-ի մարդասիրական օգնությամբ շարասյունը ենթարկվել է գնդակոծության:
