Ադրբեջանական Anspress.com կայքի փոխանցմամբ, Ադրբեջանում ԵՄ ներկայացուցչության ղեկավար Ռոլանդ Կոբիան լրագրողներին տված հարցազրույցի ժամանակ անդրադարձ է կատարել ԵՄ-Ադրբեջան հարաբերություններին.
«ԵՄ-ը շահագրգռված է Ադրբեջանի հետ անցագրային ռեժիմի մեղմացմամբ և ակնկալում է, որ շուտով կսկսվեն համապատասխան բանակցությունները։ Մենք պատրաստ ենք այդ բանակցությունները սկսել շատ շուտով՝ շաբաթներ անց։ Մենք սպասում ենք Եվրահանձնաժողովին համապատասխան մանդատի տրմանը՝ այդ բանակցությունները սկսելու համար։
Մենք ցանկանում ենք անցագրային ռեժիմի մեղմացման միջոցով առավել հաճախակի դարձնել ԵՄ-ի ու Ադրբեջանի ժողովուրդների շփումները, բայց քանի որ խոսքը գնում է միջազգային փաստաթղթի մասին, կողմերից յուրաքանչյուրը պետք է հաղթահարի որոշակի ճանապարհ։
ԵՄ-Ադրբեջան բանակցությունների հերթական փուլը տեղի կունենա հունիսի վերջին, Բաքվում։ ԵՄ-ը «Արևելյան գործընկերություն» ծրագրի շրջանակներում երկու տարում Ադրբեջանին հատկացրել է 100 միլիոն եվրո։ Հաջորդ տարի այդ ցուցանիշը կաճի 75 տոկոսով»։
Հիշեցնենք, որ «Արևելյան գործընկերություն» ծրագիրը միտված է նրան, որ ԵՄ-ին է՛լ ավելի մերձեցնի Հայաստանին, Ադրբեջանին, Վրաստանին, Մոլդովային, Բելառուսին և Ուկրաինային։ Թեև այն չի ենթադրում ԵՄ-ին անդամակցություն, այնուամենայնիվ նախատեսում է քաղաքական ու տնտեսական մերձեցում։ Այս ծրագրի մեկնարկը տրվեց 2009 թվականի մայիսի 7-ին Պրահայում կայացած ԵՄ գագաթնաժողովում։
