Մայիսի 18-ին ՀՀ Ազգային ժողովում տեղի ունեցավ ՀՀ ԱԺ նախագահ Հովիկ Աբրահամյանի և պաշտոնական այցով Հայաստան ժամանած Եվրախորհրդարանի նախագահ Եժի Բուզեկի հանդիպումը:
Ողջունելով հյուրին՝ ՀՀ Ազգային ժողովի նախագահը համոզմունք հայտնեց, որ պարոն Բուզեկի այցը Հայաստան լրացուցիչ խթան կհանդիսանա Հայաստան-Եվրամիություն հարաբերությունների զարգացման և ակտիվացման համար: Հովիկ Աբրահամյանը ջերմությամբ հիշեց Եժի Բուզեկի հետ վերջերս կայացած հանդիպումը Բրյուսելում՝ ԵՎՐԱՆԵՍԹ-ի խորհրդարանական վեհաժողովի հիմնադիր նիստին մասնակցելու այցի շրջանակներում:
ԱԺ նախագահը շնորհակալություն հայտնեց Հայաստանի հանդեպ Եվրախորհրդարանի կողմից ցուցաբերած հետաքրքրության համար, հատկապես Եվրոպական հարևանության արևելյան քաղաքականության զեկույցի կապակցությամբ, որը որակական նոր աստիճանի է բարձրացնում Հայաստան-Եվրամիություն համագործակցությունը, ինչպես նաև բարձր գնահատեց Եվրախորհրդարանի նախագահի անձնական ներգրավվածությունը Արևելյան գործընկերության և ԵՎՐԱՆԵՍԹ-ի հիմնադրման գործընթացում: Ողջունելով ԵՎՐԱՆԵՍԹ-ի ԽՎ-ի ստեղծումը՝ Հովիկ Աբրահամյանը նշեց, որ այդ կազմակերպությունը կարող է դառնալ այն հարթակը, որը հնարավորություն կտա հասնել փոխվստահության մթնոլորտի ու տարածաշրջանային համագործակցության հաստատմանը:
Եվրախորհրդարանի նախագահ Եժի Բուզեկը շնորհակալություն հայտնելով հրավերի և ջերմ ընդունելության համար՝ կարևոր համարեց Հայաստանի պատվիրակության՝ բարձր մակարդակով ներկայացված լինելը ԵՎՐԱՆԵՍԹ-ի խորհրդարանական վեհաժողովի հիմնադիր նիստին և ողջունեց այն մեծ ուշադրությունն ու կարևորությունը, որը Հայաստանը ցուցաբերում է այդ կառույցի նկատմամբ, ինչը թույլ կտա շատ հարցեր լուծել տարածաջրջանում, ներառյալ առկա խնդիրները:
Եվրախորհրդարանի նախագահն ասաց, որ ԵՎՐԱՆԵՍԹ-ը ստեղծվել է բարելավելու հարաբերությունները ԵՄ-ի և Արևելյան Եվրոպայի հարևանությամբ գտնվող երկրների հետ, նշելով, որ Հայաստանն իր դերակատարությամբ կարևոր երկիր է տարածաջրջանում:
ԵԺի Բուզեկը ողջունեց բոլոր կուսակցությունների ներկայացուցիչների ընդգրկված լինելը ԵՄ-ի հետ բանակցություններ վարող հայաստանյան պատվիրակության կազմում և հույս հայտնեց, որ նման լավ բանակցություններ տեղի կունենան նաև իշխանությունների և ընդդիմության միջև:
ՀՀ ԱԺ նախագահը փաստեց, որ եվրոպական կառույցներին ինտեգրվելու ուղղությունը Հայաստանի արտաքին քաղաքականության գերակայություններից է և անդրադարձավ Հայաստանում իրականացվող բարեփոխումների ընթացքին, իշխանությունների կողմից ձեռնարկող քայլերին, այդ թվում՝ ընտրական օրենսդրության բարելավմանը: Հովիկ Աբրահամյանը նշեց, որ իշխանությունները Հայաստանը տեսնում են եվրոպական ընտանիքում, ունեն քաղաքական կամք՝ իրականացնել բարեփոխումներ, և գործընթացները դարձնել համահունչ եվրոպական չափանիշներին:
Պատահական չէ, որ Հայաստանը ողջունեց Արևելյան գործընկերության հաստատումը և ԵՎՐԱՆԵՍԹ-ի ԽՎ-ի ստեղծումը, առաջինն էր, որ ողջունեց Եվրամիության հետ խորհրդարանական այս ձևաչափով համագործակցության գաղափարը: Հովիկ Աբրահամայնը նշեց, որ պետք է զերծ պահել ԵՎՐԱՆԵՍԹ-ը անիմաստ մեղադրանքների հարթակ դարձնելու ջանքերից: Մինչդեռ ադրբեջանական կողմը ԵՎՐԱՆԵՍԹ-ի ԽՎ-ի հիմնադիր նիստում ունեցած իր ելույթով փորձեց օգտագործել այս միջազգային հարթակը և խեղաթյուրել իրականությունը ԼՂ հակամարտության վերաբերյալ:
Եվրախորհրդարանի նախագահը շնորհակալություն հայտնեց հանգամանալից տեղեկատվության համար, մասնավորապես կարևորելով Ընտրական օրենսգրքի նախագծի լայն քննարկման փաստը: Նա նշեց, որ Եվրախորհրդարանը պատրաստ է գալիք խորհրդարանական ընտրություններին դիտորդական հանձնախումբ ուղարկել:
Անդրադարձ կատարվեց նաև ԼՂ հակամարտությանը և հայ-թուրքական հարաբերություններին: ԵԺի Բուզեկը վստահություն հայտնեց, որ ԵԱՀԿ Մինսկի խմբի գործունեությունն ի վերջո կհանգեցնի ԼՂ հարցի լուծմանը, միաժամանակ կարևորելով նաև շփումները հակամարտող կողմերի միջև:
ՀՀ ԱԺ նախագահ Հովիկ Աբրահամյանը նշեց, որ Հայաստանը բազմիցս հայտարարել է, որ հիմնախնդիրը պետք է կարգավորվի միայն ԵԱՀԿ Մինսկի խմբի ձևաչափում, խաղաղ բանակցային ճանապարհով: Մինչդեռ Ադրբեջանն իր ռազմատենչ հայտարարություններով, դիպուկահարների կրակոցներով, հարցի լուծման համար այլ ձևաչափերի ձգտելով հիմք է տալիս մտածել, որ նա չի ցանկանում խնդիրը լուծել խաղաղ ճանապարհով: Հովիկ Աբրահամյանի խոսքով՝ խնդիրը լուծում ունի մասնավորապես ԵԱՀԽ Հելսինկիի Եզրափակիչ ակտում ամրագրված միջազգային իրավունքի՝ ազգերի ինքնորոշման, տարածքային ամբողջականության և ուժի չկիրառման սկզբունքների հիման վրա:
Հանդիպմանը կարևորվեց նաև երկկողմ համագործակցության խորացումն ու կապերի զարգացումը եվրոպական կառույցների և Հայաստանի միջև:
