Թուրքիան հայտարարեց Մերձավոր Արևելքում իր ավելի ակտիվ դերակատարության մասին: Նույն օրը ՆԱՏՕ-ի անդամ երկիրը ներխուժեց Սիրիա, ինչի արդյունքում ԴԱԻՇ-ը կորցրեց Եփրատի հովտում իր տարածքների մեծ մասը:
Այնուամենայնիվ, Թուրքիայի գործողությունները դաշնակից երկրների կողմից թերահավատորեն ընդունվեցին:
Թուրքիայի վարած պատերազմը անընդունելի որակվեց
Պատճառը քրդերի դիրքերի վրա թուրքական բանակի հարձակումն էր, մասնավորապես վերջերս նվաճված Ջերաբլուսից հարավ գտնվող տարածքում: BBC-ի հրապարակման համաձայն՝ ԱՄՆ դեսպանը այդ հարձակումն անընդունելի է որակել:
«Թուրքիան լեգիտիմ և անկախ պետություն է»,- այս խոսքերը հնչեցրեց ԵՄ հարցերով թուրք նախարար Օմեր Չելիկը այն բանից հետո, երբ Ռուսաստանը նույնպես քննադատեց Թուրքիայի այդ քայլը: BBC-ի տեղեկացմամբ՝ ռուսները խնդրել են Թուրքիայի կառավարությանը՝ դադարեցնել ԴԱԻՇ-ի թշնամիների դեմ հարձակումը, ինչը դուր չի եկել թուրքերին:
Պայքար Ռուսաստանի և ԱՄՆ-ի դեմ
Թուրքիան վաղուց լարված հարաբերություններ ունի քրդական խմբավորումներից շատերի հետ: Պատճառը այդ տարածաշրջանում անկախ պետություն ունենալու քրդերի ցանկությունն է:
«Անընդունելին ահաբեկչական խմբավորման հետ համաձայնության վերաբերյալ հայտարարությունն է և ակնարկներն այն մասին, որ նրանց հետ բանակցություններ են ընթանում»,- հայտարարել է Չելիկը՝ ակնհայտորեն արտահայտելով իր հիասթափությունը՝ պայմանավորված գերտերությունների կողմից ոչ բավարար աջակցությամբ:
Ինչպես Թուրքիայի նախագահ Ռեջեփ Էրդողանը և վարչապետ Յըլդըրըմը, չելիկը նույնպես քրդերի վրա հարձակումները դադարեցնելու ցանկություն առանձնապես չի ցուցաբերել:
Գլխավոր նպատակը քրդերն են
Դա Սիրիայի ժողովրդավարական ուժերի՝ ՍԴՈՒ-ի համար վատ նորություն է: ԱՄՆ կողմից հովանավորվող այդ կազմակերպությունը անցյալ ամիս գրավեց Մանբիջը՝ ստիպելով ԴԱԻՇ-ին լքել ռազմավարական կարևորություն ունեցող սահմանային այդ քաղաքը, որտեղով ԴԱԻՇ-ը զենք և զինամթերք էր ստանում:
Թուրքիայի հռչակած «Եփրատի վահան» գործողության գլխավոր նպատակը, այսպիսով, ոչ թե ԴԱԻՇ-ի ոչնչացումն է, այլ այնպիսի ջոկատների առաջխաղացումը կասեցնելը, ինչպիսին ՍԴՈՒ-ն է:
Գործողության անվանումը հենց վկայում է, թե ինչի մասին է խոսքը. կանխել քրդերի առաջխաղացումը և խանգարել նրանց Սիրիայի հյուսիսում ստեղծել միացյալ տարածք:
