News Georgia լրատվական գործակալության փոխանցմամբ՝ Վրաստանի վարչապետ Գեորգի Կվիրիկաշվիլին լրագրողների հետ զրույցում հայտարարել է, որ Հայաստանը եղել և մնում է Վրաստանի տարածքային ամբողջականության կողմնակից։
Վրաստանի վարչապետն այդպես է մեկնաբանել աբխազական իշխանությունների ներկայացուցիչների հետ Հայաստանի նախագահ Սերժ Սարգսյանի հանդիպման մասին տեղեկատվությունը:
«Հայաստանի արտակարգ և լիազոր դեսպանը հայտարարել է, որ որևէ հանդիպում և առավել ևս պաշտոնական բանակցություններ չեն եղել։ Հայաստանը եղել և մնում է Վրաստանի կողմնակիցը, երկրի տարածքային ամբողջականության կողմնակիցը։ Մնացյալ բոլորը միայն քաղաքական շահարկումներ են»,- ասել է նա։
Հաղորդվում է, որ սրանից առաջ Աբխազիայի փոխարտգործնախարար Կան Տանիան Facebook-ի իր էջում հրապարակել էր Սերժ Սարգսյանի և Աբխազիայի փոխնախագահ Վիտալի Գաբնիայի համատեղ լուսանկարը։
Տանիան պարզաբանել էր, որ լուսանկարն արվել է ԼՂՀ անկախության 25-ամյակին նվիրված տոնական ընդունելության ժամանակ։
