Անդրադառնալով «Սասնա ծռեր»- ի գործունեությանը ԱԺ ՕԵԿ խմբակցության քարտուղար Մհեր Շահգելդյանը «Առաջին լրատվական»- ի հետ զրույցում ասաց, որ այն կարծիքին չէ, թե իշխանության դեմ պետք է որդեգրել զինված պայքարի մեթոդներ, բայց պետք է հասկանալ, թե այդպիսի պայքարի հիմքերը որտեղից են գալիս:
«Հիմքերը գալիս են այն բացարձակ դժգոհությունից, այն ատելությունից, որ այսօր կուտակվում է հասարակության մեջ, այն խիստ վատ սոցիալական վիճակից, որի մեջ գտնվում են մարդիկ: Տնտեսությունը չի զարգանում, հետընթաց է, մարդիկ թողնում, հեռանում են, ով չի կարողանում գնալ, հացի կարոտ է, մարդկանցից շատերի դեմքին կիսաքաղցած արտահայտություն է, և դա արդեն միայն մարզերում չէ»,- նշեց Մ. Շահգելդյանը:
Նրա խոսքով՝ յուրաքանչյուր քաղաքական ուժ պայքարի իր մեթոդն է ընտրում: «Ակնհայտ է, որ արմատական փոփոխություններ են անհրաժեշտ»,- ընդգծեց Մ. Շահգելդյանը՝ հավելելով, որ կաշառակերությունից, օլիգարխիզացիայից, անարդարություններից դժգոհությունն ամենուր է:
Անդրադառնալով ՏԻՄ ընտրություններին մասնացությանը, Մհեր Շահգելդյանը նշեց, որ քաղաքակիրթ, ժողովրդավարական հասարակություն ձևավորելու նպատակով ընտրությունները այն ճանապարհն են, որով պետք է փոխվի իշխանությունը: Նրա խոսքով՝ ՏԻՄ ընտրություններում ընտրակեղծիքներ են արվում, որոնց մասնակցում են նաև գյուղապետերը, որովհետև նրանցից շատերի մտածելակերպը քյոխվայի մտածելակերպ է:
Մհեր Շահգելդյանի կարծիքով՝ ընդդիմությունը պետք է մասնակցի ընտրություններին և պետք է պայքարի հաղթանակի համար: Նա համոզված է, որ ՏԻՄ ընտրություներում, մասնավորապես Վանաձորում և Գյումրիում իրենց առաջադրած թեկնածուները հաղթանակի լուրջ հնարավորություն ունեն: Անդրադառնալով հարցին, թե արդյո՞ք դաշինք կազմելով և միավորվելով ավելի մեծ չէր լինի ընտրություններում հաղթելու հավանականությունը, Մ. Շահգելդյանը նշեց, որ իրենք կողմնակից են կոնսոլիդացիային, և «Հայկական վերածնունդ»-ը հենց համախմբման արդյունք է:
Մ. Շահգելդյանի խոսքով՝ «Օրինաց երկրին» մշտապես ուղում են հետևյալ հարցադրումը. ինչո՞ւ իշխանության հետ կոալիցիա կազմեցիք 2008-ին: «2008-ին և՛արտաքին, և՛ ներքին մարտահրվերներ կային…. Եթե 2008-ին կոալիցիա չկազմեինք, զոհերը շատ էին լինելու»,- ընդգծեց ԱԺ ՕԵԿ խմբակցության քարտուղարը:
Մանրամասները՝ տեսանյութում:
