Չինաստանի իշխանությունները սկսել են 8000 մարդկանց վերաբնակեցումը, ովքեր բնակվում են աշխարհի խոշորագույն՝ FAST ռադիոաստղադիտակից ոչ հեռու։ Ռադիոաստղադիտակի կառուցումը կավարտվի սեպտեմբերին՝ հայտնում է «Սինհուա» գործակալությունը՝ հղում անելով տեղի իշխանություններին։
Աստղադիտակի շինարարությունը սկսվել էր 2011 թվականի մարտին։ Աստղադիտակը զբաղեցնում է 30 ֆուտբոլային դաշտի տարածք։ Այն գտնվում է Չինաստանի հարավ-արևմուտքում՝ Գույչժոու նահանգի բարձր լեռներում։ Աստղադիտակի տրամագիծը կազմում է 500 մետր, պարագիծը՝ 1.6 կմ։ Նախագծում ներդրումների ընդհանուր ծավալը գնահատվում է 1.2 մլրդ յուան։
Բնակիչների համար, որոնց իշխանությունները որոշել են վերաբնակեցնել՝ հեռացնելով աստղադիտակից 5 կմ շառավղով գոտուց, կառուցվել են 600 տներ երկու նոր բնակավայրերում, որոնք գտնվում են նրանց բնակության վայրից 10 կմ հեռու։
