Թուրքական NTV հեռուստաալիքի փոխանցմամբ՝ Թուրքիայի նախագահի պաշտոնական ներկայացուցիչ Իբրահիմ Քալընն Անկարայում կազմակերպված մամուլի ասուլիսի ժամանակ հայտարարել է, որ Թուրքիան ոչ մի համաձայնագիր չի կնքի Սիրիայի քրդերի ահաբեկչական խմբավորումների հետ:
«Խոսքը բացարձակապես «Դեմոկրատական միություն» կուսակցության (PYD) կամ Ժողովրդական ինքնապաշտպանական ուժերի (YPG) հետ հրադադարի շուրջ պայմանավորվածության գալու մասին չէ: Դրանք ահաբեկչական կազմակերպություններ են: Թուրքիայի համար խոսք չի կարող լինել, որ նա համաձայնագրեր կնքի PYD-ի ու YPG-ի հետ»,- ասել է Քալընը:
Ավելի վաղ Թուրքիայի՝ Եվրամիության հարցերով նախարար Օմեր Չելիքն էր ժխտել Թուրքիայի զինված ուժերի ու Սիրիայի քրդերի միջև հրադադարի մասին համաձայնագրի առկայությունը:
Չելիքը դատապարտել էր մի շարք երկրների ներկայացուցիչների կողմից դրա հակառակի պնդումը՝ անթույլատրելի համարելով, որ ինքնիշխան Թուրքիայի Հանրապետությանը դնում են ահաբեկչական կազմակերպության հետ մեկ հարթության վրա:
