Մեքսիկայի նախագահ Էնրիկե Պենյա Նյետոն հանդիպման առաջարկ է հղել ԱՄՆ նախագահի երկու թեկնածուներին՝ Դոնալդ Թրամփին և Հիլարի Քլինթոնին: Այս մասին հայտնում է CNN-ը՝ հղում անելով Մեքսիկայի նախագահի մամլո ծառայությանը:
Մեքսիկայի նախագահի ներկայացուցիչների մեկնաբանությունների համաձայն, որոնց հղում է անում հեռուստաալիքը, հանդիպումներից ոչ մեկը առայժմ պաշտոնապես նշանակված չէ:
Թրամփը հաստատել է, որ չորեքշաբթի կհանդիպի Նյետոյի հետ: «Ես ընդունել եմ Մեքսիկայի նախագահ Էնրիկե Պենյա Նյետոյի հրավերը և անհամբերությամբ սպասում եմ վաղը կայանալիք մեր հանդիպմանը»,- ասվում է Թրամփի թվիթերյան պաշտոնական էջում տեղադրված հաղորդագրության մեջ:
Մեքսիկայի նախագահի վարչակազմը ևս հաստատել է առաջիկա հանդիպումը: «Դոնալդ Թրամփն ընդունել է հրավերը և վաղը մասնավոր կարգով կհանդիպի նախագահի հետ (Մեքսիկայի)»,- տեղեկացնում են մեքսիկական իշխանությունները Twitter-ում:
Ավելի վաղ Washington Post թերթը հայտնել էր, որ Թրամփը ծրագրում է մեկնել Մեքսիկա՝ հանդիպելու այդ երկրի ղեկավարի հետ:
Մեքսիկայի նախագահն իր հերթին ավելի վաղ հայտարարել էր, որ պատրաստ է հանդիպել Թրամփի հետ, բայց միայն այն դեպքում, երբ նա հաղթի նախագահական ընտրություններում:
2016թ. մարտին Նյետոն Թրամփի ելույթների «խիստ տոնը» համեմատել էր Ադոլֆ Հիտլերի և Բենիտո Մուսոլինիի ելույթների ոճի հետ՝ նշելով, որ նա առաջարկում է «անիրական պարզ լուծումներ բարդ խնդիրների համար»: Ավելի ուշ նա պարզաբանել էր, որ այդ համեմատությամբ ուզում էր հիշեցնել, թե ինչի կարող է հանգեցնել պոպուլիզմը:
Ավելի վաղ Թրամփը սկանդալ էր առաջացրել Մեքսիկայի հետ սահմանին պատ կառուցելու և այդ պատի համար Մեքսիկային վճարել ստիպելու առաջարկով: Նրա խոսքով՝ պատի նպատակը կլինի անօրինական միգրացիայի կանխումը: Մեքսիկայի նախագահը, սակայն, կտրականապես հերքել է ի հաշիվ Մեքսիկայի շինարարության համար վճարելու հնարավորությունը:
