Գյուղացին ոռոգման ջրի գների պատճառով կրկնակի թալանվում է: Այսօր այս մասին լրագրողների հետ հանդիպման ժամանակ ասաց Ագրարագյուղացիական միության նախագահ Հրաչ Բերբերյանը:
Բանախոսը նշեց, որ հանրապետությունում ծանր է ոռոգման համակարգի վիճակը: Նա պատմեց, որ օրերս եղել են Շիրակի մարզում, և մասնավորապես՝ Արթիկի տարածաշրջանում ծեծկռտուքներ են եղել ջրի պատճառով: Ըստ նրա՝ գյուղացիներ կան, որոնց հողը ճաքճքված է, ինչի արդյունքում բերքատվությունն անկում է ապրում, և առաջանում են այլ խնդիրներ ևս:
«Անվտանգության խորհրդի նիստում խոսվեց ոռոգման ոլորտում բարեփոխումների մասին: Օրինակ՝ մենք ՋՈ-ներին դեմ չենք, գյուղապետերին, կոոպերատիվների նախագահներին, որոնք ցանկություն ունեն «Ջրառի» հետ պայմանագիր կնքել, առաջարկում ենք գնալ և այդ պայմանագրերը կնքել: Մենք առաջարկում ենք մտցնել ջրի մրցունակություն: Գյուղացու վրա ջուրը կրկնակի են հաշվում. մեկ ոռոգումը արժե 17 հազար դրամ՝ այն դեպքում, երբ կես գին պետք է լիներ:
Կրկնակի թալան է գնում: Վարչապետի վերահսկողությունը բացահայտեց այդ խախտումները: Եթե մի համայնք ցանկանում է չորսուկես դրամով ձեռք բերել ոռոգման ջուր, «Ջրառը» պետք է վաճառի»,- ասաց Հրաչ Բերբերյանը:
Լուսանկարը՝ PanARMENIAN Photo-ի
