Ռուսական Vesti.ru կայքի փոխանցմամբ՝ ֆրանսիացի աստղագետները վստահեցնում են, որ իրենք հայտնաբերել են մի մոլորակ, որում հնարավոր է երկրային կենսատեսակներին նման կյանքի առկայություն։
Gliese 581d մոլորակի վերաբերյալ ստացված տվյալների մոդելավորումը ցույց է տվել, որ դրա վրա հնարավոր են հեղուկ օվկիանոսների, իսկ մթնոլորտում՝ ջրային գոլորշիների և սառցաբեկորների առկայություն, իսկ կլիման, հնարավոր է, բավականին տաք է՝ ապահովելու համար երկրայինին մոտ պայմանների և, ուստի, երկրային կյանքի ձևերին մոտ կենսաձևերի առաջացման և զարգացման հնարավորություններ։
Մոլորակը գտնվում է Արեգակնային համակարգությունից 20 լուսատարի հեռավորության վրա և պտտվում է Gliese 581 կարմիր թզուկ աստղի շուրջը՝ օպտիմալ հեռավորության վրա։
Միևնույն ժամանակ, այս մոլորակի վրա առկա պայմաններն, այնուամենայնիվ, երկրայինից որոշակի տարբերություններ են առաջ բերում։ Աստղագետները գտնում են, որ նրա մթնոլորտը կրկնակի ավելի խիտ է, քան Երկիր մոլորակինը, և բաղկացած է հիմնականում ածխաթթու գազից, ինչը պակասեցնում է երկրային՝ մեզ ծանոթ կենսաձևերի առաջացման հնարավորությունը։ Մոլորակը պատված է գորշակարմիր ամպերով, իսկ ձգողական դաշտը երկու անգամ գերազանցում է Երկրագնդինը։ Միևնույն ժամանակ, ածխաթթու զագն ինքնին ստեղծում է ջերմոցային էֆեկտ՝ տաքացնելով մոլորակի մակերևույթը և ապահովելով կյանքի մեզ ծանոթ տեսակների համար անհրաժեշտ ջերմաստիճանային ռեժիմը։
Այս մոլորակի վերաբերյալ հրապարակված զեկույցներում նշվում է, որ մոտ ապագայում, անշուշտ, այս մոլորակ հետազոտական սարքեր ուղարկել հնարավոր չէ։
Հավելենք, որ արտաարեգակնային մոլորակները սովորական՝ անգամ ամենաուժեղ աստղադիտակներով հայտնաբերել հնարավոր չէ և դրանց փնտրտուքի համար օգտագործվում են միանգամայն այլ մեթոդներ ու տեխնոլոգիաներ։