Երևանի քաղաքապետ Տարոն Մարգարյանի նախաձեռնությամբ հուլիսի 10-ից Ռումինիայի ծովափնյա ճամբար հանգստի մեկնած երևանցի 46 շնորհալի աշակերտների առօրյան հագեցած է տարատեսակ ծրագրերով: Երևանի քաղաքապետարանի տեղեկատվության և հասարակայնության հետ կապերի վարչությունից «Առաջին լրատվական»-ին հայտնումե ն, որ Ռումինական կողմի կազմակերպած համերգին հայ աշակերտները ելույթ են ունեցել բովանդակալից համերգային ծրագրով: Երևանցի շնորհալի դպրոցականները՝ երգիչները, պարողները և երաժիշտները, ռումինացի հանդիսատեսին են ներկայացրել Սայաթ-Նովայի ստեղծագործություններից, հատվածներ «Անուշ» օպերայից, հայկական պարեր: Երեխաները ելույթն սկսել են ՀՀ օրհներգով և ամփոփել Երևանի օրհներգի կատարումով ՝ ռումինացի հասակակիցների երգակցմամբ:
Հայ երեխաները ռումինական ծովափում հանդես են եկել նաև հանպատրաստից ֆլեշ–մոբով. ծածանելով Հայաստանի դրոշը՝ հայկական ազգային երաժշտական նվագարանների ուղեկցությամբ հայ աշակերտները երգել են ժողովրդական երգեր, նաև շուրջպար են բռնել՝ արժանանալով բազմաթիվ անցորդների հիացմունքին՝ գրավելով բոլորի հետաքրքությունը դեպի հայկական մշակույթը։
Ամառային արձակուրդների օրերին աշակերտական արտերկրյա ճամբարի այս ծրագիրը վերջին տարիների ամենամեծամասշտաբն է։ Երևան-Բուխարեստ աշակերտական ճամբարի անցկացման համաձայնությունը ձեռք է բերվել Երևանի և Բուխարեստի քաղաքապետերի հանդիպման ժամանակ և իրականացվում է երկու քաղաքների քաղաքապետարանների ֆինանսական հոգածությամբ։ Ռումինական կողմը նմանատիպ ծրագրերը շարունակական դարձնելու ցանկություն է հայտնել։
