Հայաստանը կնախաստորագրի Ասոցացման համաձայնագիրը: Նման տեսակետ այսօր լրագրողների հետ հանդիպմանն ասաց Կովկասի ինստիտուտի տնօրեն, քաղաքագետ Ալեքսանդր Իսկանդարյանը. «Ասոցացման համաձայնագրի նախաստորագրման ժամանակը մոտենում է, քաղաքականության մեջ ամեն ինչ հարյուր տոկսանոց չէ, միշտ ինչ-որ բաներ կարող են լինել: Բայց գործընթացը լավ է գնում, և նախաստորագրման հավանականությունը մեծ է, աշխատանքները նորմալ են ընթանում և կարծում եմ, որ Հայաստանը կնախաստորագրի»:
Նրա խոսքերով՝ ֆորս-մաժորներ բացառել պետք չէ: Իսկանդարյանը հիշատակեց խորհրդարանի գնդակահարությունը, Վրաստանում ռուս-վրացական պատերազմը՝ նշելով, որ «դրանք իրական ֆորս-մաժորներ էին, և երբեք չի կարելի ասել երբեք»։ «Ես բազմիցս ասել եմ, այսօր ևս կկրկնվեմ, որ ԵվրԱզԷսի, Մաքսային միության, և Ասոցացման համաձայնագրի մեջ հակադրություն չկա, Հայստանին Մաքսային միությունում և ԵվրԱզէսում չեն սպասում, ավելին դրանք դեռ գոյություն չունեցող կազմակերպություններ են»,– ասաց քաղաքագետը։
Նրա գնահատմամբ՝ խնդիր է փակ սահմանների հարցը, որը և Սերժ Սարգսյանը հիշատակել էր Մոլդովայում. «Եթե սահմանը բաց լիներ, այլ համագործակցություն կլիներ։ Մեր առաջին առևտրական գործընկեր Գերմանիայի հետ ևս խնդիր և դժվարություն է առաջանում՝ մի քանի սահմաններով է անցնում ապրանքը, այդ խնդիրը կմնա, բայց Եվրոպան վախենամ, որ Թուրքիայի հետ չի բանակցի սահմանների բացման հարցում, որովհետև չի կարող: Եթե օրինակ Թուրքիան դրանից հետո մտներ Եվրամիություն՝ ուրիշ հարց, բայց նրանց ոչ ոք Եվրամիություն չի ընդունի: Ես չեմ ասում սահմանների բացման հարցն անհնար է, բայց Եվրոպան չի բանակցի այդ հարցով:
Ալեքսանդր Իսկանդարյանի կարծիքով՝ Ասոցացման համաձայնագրի նախաստորագրումից հետո Ղարաբաղում փոփոխություն չի լինի: «Առաջին լրատվական»-ի այն հարցին, թե խոսվում է Ասոցացման համաձայնագրի դրական կողմերի մասին, բայց ի՞նչ վատ հետևանք կարող է ունենալ նախաստորագրումը, Իսկանդարյանը պատասխանեց. «Այն մարդիկ, ովքեր ասում էին, որ նախստորագրումը չի լինի Ռուսաստանի ճնշումների պատճառով, կսկսեն ասել, որ նախաստորագրումը եղավ, բայց ստորագրումը չի լինի Ռուսաստանի ճնշման պատճառով»:
Լուսանկարը՝ PanARMENIAN Photo-ի
