Ադրբեջանական Trend լրատվական գործակալության փոխանցմամբ՝ Իրանն ու Ադրբեջանը բանակցում են համաշխարհային շուկա ադրբեջանական նավթի հետագա մատակարարման համար նավթային սվոփի շուրջ (սվոփը առևտրա-ֆինանսական փոխանակային գործարք է՝ տարատեսակ ակտիվների փոխանակության տեսքով): Այս մասին երեկ հայտարարել է Ադրբեջանում Իրանի դեսպան Մոհսեն Փակ Այինը:
2010 թվականին Իրանը դադարեցրել էր Ադրբեջանի, Ղազախստանի ու Թուրքմենստանի հետ նավթային սվոփները:
Նավթի փոխադարձ մատակարարումների վերաբերյալ համաձայնագրերի շրջանակներում, որոնք մեկնարկել են 1997 թվականին և շարունակվել ավելի քան 12 տարի, Իրանը Նեկա նավահանգստում նավթ է ստացել Ադրբեջանից, Ղազախստանից ու Թուրքմենստանից և փոխարենը իր նավթի համապատասխան ծավալը հասցրել Պարսից ծոցի երկրներ:
Իրանցի դեսպանը նաև հայտարարել է, որ Իրանն ու Ադրբեջանը շարունակում են բանակցել գազային սվոփի ծավալի մեծացման շուրջ: Ընդգծվում է, որ երկու երկրները ունեն գազային ենթակառուցվածք, որի օգնությամբ Ադրբեջանը վառելիք է մատակարարում Իրանի հյուսիսային նահանգներին:
Իրանն իր հերթին ապահովում է Նախիջևանի Ինքնավար Հանրապետության գազային կարիքները: Խոսելով Եվրոպա իրանական գազի արտահանման խնդրի մասին՝ Փակ Այինը հայտարարել է, որ երկիրը ներկա դրությամբ ուսումնասիրում է անհրաժեշտ ենթակառուցվածքի կառուցման, տարանցման արժեքի ու տարանցիկ երթուղու հարցերը:
