Եգիպտոսում՝ Սինայի թերակղզու հյուսիսում, ինքնաշեն պայթուցիկ սարքի պայթյունի հետևանքով ավտոբուսում զոհվել է առնվազն 2, վիրավորվել 17 մարդ: Այս մասին հաղորդում է RIA Novosti-ն՝ վկայակոչելով տեղի ԶԼՄ-ները:
Բժիշկները չեն բացառում, որ զոհերի թիվը կարող է մեծանալ, քանի որ տուժածներից շատերը ծայրահեղ ծանր վիճակում են:
Դեպքը տեղի է ունեցել կիրակի՝ ուշ երեկոյան, Ալ-Արիշ քաղաքի մոտակայքում: Հատուկ ծառայությունների տվյալներով՝ ահաբեկիչների թիրախները եղել են ռազմական օբյեկտները, որոնց մոտով անցել է տեղի ցեմենտի գործարանի աշխատակիցներին փոխադրող ավտոբուսը:
Եգիպտոսի բանակը վերջին օրերին լայնածավալ ռազմական գործողություն է անցկացնում Սինայի լեռնային շրջաններում՝ հետապնդելով ծայրահեղականների խմբերին:
