Հայաստանում «Բազե-2016»-ին մասնակցում են շուրջ 500 երիտաարդներ՝ հանրապետությունից, Արցախից, Ջավախքից:
ԱԺ ՀՀԿ խմբակցության պատգամավոր Կարեն Ավագյանը անդրադառնալով այս միջոցառման կազմակերպման վրա ծախսված միջոցներին՝ «Առաջին լրատվական»-ի հետ զրույցում նշեց. «Առայժմ վաղ է խոսել կոնկրետ գումարի մասին, քանի որ ծրագիրը դեռ շարունակվում է»:
Նրա խոսքով՝ գումարը հիմնականում ծախսվում է սննդի և հագուստի վրա, իսկ մյուս հարցերը կազմակերպվում են կամավորության սկզբունքով:
Ինչպես նշեց մեր զրուցակիցը, իրենց ֆինանսական հաշվետվությունը հրապարակային է, և իրենք ամեն տարի դա ներկայացնում են. «Կարևոր է ոչ թե այն, թե որքան է ծախսվել, այլ այն, թե ինչ բովանդակության վրա է ծախսվել: Իսկ ընդհանրապես մենք էս վերջին ժամանակներս ընկել ենք ծախսերի հետևից՝ առանց ուշադրություն դարձնելու ծրագրի կարևորությանը»:
Պատգամավորի խոսքով՝ հասարակության մոտ ձևավորված է այն թյուր կարծիքը, թե այստեղ հավաքվում և իրենց ազատ ժամանցն են կազմակերպում էլիտար երիտասարդները, մինչդեռ սա ռազմահայրենասիրական դաստիարակություն ապահովող, կապ հաստատող և համախմբող ծրագիր է:
«Այս գումարը ոչնչով չի խանգարում այն գումարներին, որը մենք տալիս ենք սահմանամերձ համայնքներին. մեկը մյուսին երբեք չի խանգարում, այլ ընդհակառակը՝ լրացնում են: Այս ծրագիրը 14 տարիների ընթացքում ապացուցել է իր կարևորությունը՝ որքան էլ փորձել են պիտակավորել»,- նշեց Կարեն Ավագյանը՝ ընդգծելով, որ այս վերջին տարիներին պետբյուջեից ոչ մի գումար չի ծախսվել ճամբարի վրա, դրանք ամբողջովին հիմնադրամի միջոցներն են: