BMW ընկերությունը զբոսաշրջության սիրահարների ցուցահանդեսին ներկայացրել է իր Active Tourer Outdoor հեչբեքը: Մոդելը նախատեսված է ակտիվ հանգիստը նախընտրողների համար:
Հեչբեքում երկու հեծանիվներ ամրացնելու հատուկ տեղ կա: Սարքավորումը բեռնախցիկում է տեղադրված: Ինչպես նշել են BMW-ի ներկայացուցիչները, Active Tourer Outdoor-ի բեռնախցիկն ամուր նյութերից է պատրաստված, որոնք շատ հեշտ են մաքրվում: Ընկերությունն ավելացրել է, որ հեծանիվները բեռնախցիկում պահելու գաղափարը հնարավորություն կտա դրանք գողերի աչքերից հեռու և մաքուր պահել ցանկացած եղանակի:
Active Tourer Outdoor-ի երկարությունը 4350 մմ է, լայնությունը՝ 1833 մմ, իսկ բարձրությունը՝ 1576 մմ: Մոդելը հագեցած է հիբրիդային ուժային սարքավորումով, որը ներառում է 1,5 լիտրանոց բենզինային շարժիչը, էլեկտրաշարժիչը և լիթիում-իոնային մարտկոցներ:
Հեչբեքը հագեցած է նաև Eco Pro ռեժիմով, որի գործարկման ժամանակ ավտոմեքենայի էլետրոնիկան նվազեցնում է կոնդիցիոների հզորությունը և այլ սարքավորումների էլեկտրականություն օգտագործելու մակարդակը: Դրանից բացի, նավիգացիոն համակարգը, հաշվի առնելով բոլոր խցանումները, հուշում է ամենաօպտիմալ ճանապարհը:
Տեղից 100կմ/ժ-ն Active Tourer Outdoor-ը զարգացնում է 8 վայրկյանում: Մոդելի առավելագույն արագությունը 200 կմ/ժ է:
