Լիբանանյան «Աս-Սաֆիր» թերթի փոխանցմամբ՝ Սաուդյան Արաբիան Սիրիայում գործող քրդական ջոկատներին առաջարկել է սպառազինություն ու ֆինանսավորում՝ պայմանով, որ նրանք կշարունակեն կառավարական զորքերի դեմ պատերազմը:
Այդ մասին թերթին հայտնել են «Քրդստանի աշխատավորական» կուսակցության (PKK) ռազմական թևին մոտ կանգնած աղբյուրները: Նրանց հաղորդմամբ՝ Էր-Ռիյադը առաջարկել է պաշտոնական խողովակներով՝ երկկողմ հանդիպման ժամանակ:
Աղբյուրները նաև հայտնել են, որ Սաուդյան Արաբիայից առաջին անգամ չէ, որ ստացվում է նման առաջարկ, և ամեն անգամ գլխավոր պայմանը դառնում է սիրիական բանակի դեմ քրդերի զինված ջոկատների պայքարելը:
Քրդական ջոկատների և Սիրիայի կառավարական զորքերի միջև մարտերը Էլ-Հասակա քաղաքում սկսվել են օգոստոսի 16-ին: Սիրիական բանակը հայտարարել է, որ քրդերը հարձակվել են կառավարական զորքերի վրա և փորձել են գրավել քաղաքը: Սիրիական օդուժն իր հերթին երկու անգամ հարվածել է քրդերի դիրքերին:
