Մադրիդի «Ռեալ»-ի առաջատար Քրիշտիանու Ռոնալդուն հայտարարել է, որ անցած մրցաշրջանը լավագույնն էր իր մարզական կարիերայում: Հինգշաբթի օրը Մոնակոյում Չեմպիոնների Լիգայի խմբային փուլի վիճակահանության ժամանակ կհայտարարվի մրցաշարի 2015/16թթ մրցաշրջանի լավագույն ֆուտբոլիստի անունը:
Հիշեցնենք, որ այդ տիտղոսի համար Քրիշտիանուն կպայքարի Գարետ Բեյլի և Անտուան Գրիզմանի հետ:
«Նախորդ մրցաշրջանում այդքան էլ լավ չմեկնարկեցինք, բայց ավարտեցինք ինչպես հարկն է: Զինեդին Զիդանի գլխավորությամբ թիմը բարելավել է իր խաղը: Մենք կարողացանք հաղթել Չեմպիոնների Լիգայի խաղարկությունում, իսկ ես դարձա մրցաշարի լավագույն ռմբարկու: Եթե հաշվի առնենք մրցանակները, ապա նախորդ մրցաշրջանը լավագույնն էր իմ մարզական կարիերայում: ՉԼ գավաթը նվաճելուց հետո, իմ երկրի ազգային թիմի կազմում դարձա Եվրոպայի չեմպիոն: Նման հաջողություն իմ մարզական կարիերայում չէր գրանցվել», – նշել է Ռոնալդուն:
