Oxfam բարեգործական կազմակերպությունը Բրիտանիայի նախարարների կաբինետին մեղադրել է զենքի առևտրի մասին պայմանագիրը խախտելու մեջ՝ զենք մատակարարելով Եմենում կռվող Սաուդյան Արաբիային: Այս մասին հայտնում է BBC-ն:
Կազմակերպությունում սաուդցիներին զենքի վաճառքի գործարքը հաստատած նախարարներին մեղադրել են «ակնհայտը հերքելու» մեջ: Ըստ Oxfam-ի՝ Սաուդյան Արաբիային զենքի մատակարարումը նպաստում է պատերազմի երկարաձգմանը, որի հետևանքով փախստական է դարձել արդեն 2,8 մլն մարդ:
Կազմակերպությունում հայտարարում են, որ Բրիտանիան զենքի առևտրի մասին միջազգային պայմանագրի «եռանդուն կողմնակցից» վերածվել է դրա հիմնական խախտողներից մեկի:
Երեքշաբթի Ժնևում ներկայացվելիք Oxfam-ի զեկույցում ասվում է, որ կառավարությունը խորհրդարանին մոլորության մեջ է գցել գործարքի հետևանքների հարցում:
«Ռմբակոծություններից (Եմենում սաուդյան կոալիցիայի), ինչը հետևանք է ռազմական գործողությունների կանոնների խախտման, տուժել են դպրոցներ, հիվանդանոցներ և բնակելի տներ»,- ասվում է զեկույցում:
Բրիտանական կառավարության ներկայացուցիչը BBC-ի հետ զրույցում ասել է, որ կաբինետում գոհ են այն երաշխիքներից, որոնք իրենց տրամադրել է զենքը գնած կողմը: «Իրավիճակը վերահսկվում է»,- ասել է նա:
2014թ. ընդունված զենքի առևտրի մասին միջազգային պայմանագիրը սահմանում է զենքի արտահանման չափանիշներ, այդ թվում՝ արգելվում է սովորական զենքերի արտահանումը՝ ի խախտումն էմբարգոյի և պատժամիջոցների, նաև զենքերի, որոնք կօգտագործվեին՝ իրագործելու համար ցեղասպանություն, մարդկության դեմ հանցագործություններ, ռազմական հանցագործություններ և ահաբեկչություններ:
