ԱԺ ՀՀԿ խմբակցության պատգամավոր Դավիթ Հարությունյանն այսօր նախքան ՀՀԿ ԳՄ նիստի մեկնարկը լրագրողների հետ զրույցում վստահեցրել է, որ ԱԺ նախագահի և վարչապետի հարաբերությունները լարված չեն, ինչպես որ ներկայացվում է մամուլում:
«Բացարձակ նման կերպ չեմ կարծում»,- ասել է Դավիթ Հարությունյանը:
Դիտարկմանը, թե այդ հակասությունը առաջացել է Սերժ Սարգսյանի իրավահաջորդը լինելու հետ կապված, Դավիթ Հարությունյանը արձագանքել է. «Նման հակասություններ չկան: Ես կարծում եմ, որ շատ վաղ է այդ հարցը քննարկել, ի վերջո մի մոռացեք, որ ընտրությունները այս տարի են եղել, և դա ամենևին չի նշանակում, որ մենք այսօր պետք է մտածենք: Առջևում մենք ժամանակ ունենք, լուրջ անելիքներ կան, դժվար է լինելու, և կարծում եմ, որ այս տարիներին մենք պետք է առաջին հերթին աշխատենք: Իշխող կուսակցությունները և ոչ իշխող կուսակցությունները այլ խնդիրներ ունեն լուծելու»:
Հարցին, թե ինչու Սերժ Սարգսյանն այդպես էլ չանդրադարձավ օֆշորային սկանդալին, ԱԺ պատգամավորը նշել է. «Հարցը հայտնվել է դատախազության տիրույթում, իսկ ցանկացած հարց երբ գտնվում է դատախազության տիրույթում կարծում եմ, որ որևէ լուրջ քաղաքական գործիչ զերծ կմնար նման հարցին անդրադառնալուց: Երբ որ դատախազությունը հանդես գա հայտարարությամբ և իր գնահատականներով, կարծում եմ, որ քաղաքական գործիչները կունենան իրենց դիրքորոշումը»:
Դիտարկմանը, թե ՍԴ նախագահ Գագիկ Հարությունյանը նշել է, որ իրավունք չունի չհավատալու Կիպրոսի դատախազի հայտարարությանը, Դ. Հարությունյանը ասել է. «Իհարկե ես իրավունք չունեմ չհավատալու Կիպրոսի դատախազի ասածներին, սակայն ուշադրություն դարձրեք՝ Կիպրոսի դատախազը վերջում ասաց մի կարևոր նախադասություն՝ որևէ կոնկրետ գործի վերաբերյալ կարծիք հայտնելու համար ես պետք է ծանոթ լինեմ գործի նյութերին, ուրեմն Կիպրոսի դատախազին ես ևս չհավատալու որևէ հիմք չունեմ, բայց միաժամանակ ստորագրում եմ Կիպրոսի դատախազի յուրաքանչյուր խոսքի տակ, որ որևէ կոնկրետ գործի վերաբերյալ եզրակացություն տալու համար պետք է ծանոթանալ տվյալ գործին»: