ԱՄՆ նախագահի հանրապետական թեկնածու Դոնալդ Թրամփը երկրում ընթացիկ նախագահական արշավի ընթացքում առաջին անգամ հրապարակավ խոստովանել է, որ երբեմն տաքացած խոսում է, հետո զղջում դրա համար: CNN-ի հաղորդմամբ՝ այս մասին նա հայտարարել է հինգշաբթի Շառլոտ քաղաքում (Հյուսիսային Կարոլինա նահանգ):
«Երբեմն վեճերի թեժ պահերին միանգամից շատ խնդիրների անդրադառնալով՝ ճիշտ բառեր չես ընտրում կամ ինչ-որ բան այնպես չես ասում: Ինձ հետ այդպես պատահել է,- ասել է միլիարդատերը:- Հավատում եք, թե ոչ, բայց ես զղջում եմ դրա համար: Ես հատկապես ցավում եմ այն դեպքերի համար, երբ դա կարող էր ինչ-որ մեկին ցավ պատճառել»:
Միաժամանակ նա, դիմելով ընտրողներին, նշել է. «Մի բան ես կարող եմ ձեզ խոստանալ. ես միշտ ձեզ կասեմ ճշմարտությունը»: Թրամփը նաև հավելել է, որ այսուհետ ևս մտադիր չէ իրեն պահել քաղաքական կոռեկտության շրջանակներում:
CNN-ը նշում է, որ Թրամփի այս խոստովանությունը կտրուկ շրջադարձ է նրա ռազմավարության մեջ, քանի որ իր արշավի սկզբից ի վեր նա ոչ մի սխալ չի ընդունել:
