Օրհուս քաղաքում 2 դանիացի քաղաքական գործիչների դեմ գործ են հարուցել՝ Թագավորության միգրացիոն օրենքները խախտելու մեղադրանքով: Այս մասին հայտնում է The Local-ը:
Մեղադրանք է ներկայացվել երկու կանանց՝ քաղաքային խորհրդի պատգամավոր Մարիա Սլոթիի և նրա կուսակից ու հարևանուհի Աննե Հեգելունդիի դեմ: Նրանք թույլ են տվել իրենց բնակտարածքում գիշերել աֆրիկացի ներգաղթյալների, իսկ հաջորդ օրը նրանց համար լաստանավի տոմսեր են գնել մինչև Նորվեգիա: Երկու կանայք ծայրահեղ ձախ «Կարմիր-կանաչ դաշինք» կուսակցության անդամ են:
Երբ նրանք այդ մասին պատմել են տեղական թերթերից մեկին, քաղխորհրդի մեկ այլ պատգամավոր՝ պահպանողական Մարկ Պերերա Քրիստենսենը, նրանց դեմ ոստիկանությունում հայտարարություն է տվել: Նրա խոսքով՝ երիտասարդ քաղաքական գործիչներին վայել չէ խախտել երկրի օրենքները:
«Մենք կարծում ենք, որ նրանք միտումնավոր նպաստել են սահմանն ապօրինի հատելուն և անօրինական բնակեցմանը, ուստի պնդում ենք ազատազրկման հարցում»,- դատարանում հայտարարել է դատախազ Յակոբ Բալսգարդ Նիլսենը:
Միևնույն ժամանակ նա նշել է, որ եթե դատարանը երկիր փախստականների հոսքը ճանաչի որպես «հատուկ հանգամանք», ապա մեղադրանքը կբավարարվի 5 000 կրոն (մոտ 760 դոլար) տուգանքով:
Կանայք նշել են, որ չեն իմացել իրենց գործողությունների անօրինականության մասին, պարզապես առաջնորդվել են խղճով:
