Google ընկերությունը գործարկել է իր դիտարկիչի կայուն՝ Chrome 28 տարբերակը, որի գլխավոր նորամուծություններից մեկը հանդիսանում է «Ծանուցումների կենտրոնը»: Այս մասին ասվում է ընկերության պաշտոնական բլոգում՝ փոխանցում է Lenta.ru-ն:
Նախկինում Chrome-ում ստացվել են ծանուցումներ միայն կայքերից, մինչդեռ Chrome 28-ում ծանուցումներ կստացվեն նաև հավելվածներից: Բացի այդ, ծանուցումներն ավելի ֆունկցիոնալ են դարձել: Դրանք կարող են պարունակել տեքստ, նկարներ և աղյուսակներ, ինչպես նաև գործողություններ առաջարկել օգտատերերին (օրինակ՝ նամակին պատասխանել):
Ծանուցումները կարելի է տեսնել նաև այն ժամանակ, երբ դիտարկիչը փակ է:
Chrome 28-ի հիմքում ընկած է ոչ թե WebKit վեբ շարժիչը, այլ Blink-ը: Blink վեբ շարժիչով է գործում նաև Opera-ում:
Chrome 28-ը թողարկվել է Windows, OS X և Linux ՕՀ-ների համար: «Ծանուցումների կենտրոնը» դեռևս հասանելի է միայն Windows-ին: Հետագայում մյուս ՕՀ-ները կհամալրվեն այդ գործառույթով:
Տարբեր գնահատականներով՝ դիտարկիչների համաշխարհային շուկայում Chrome-ին բաժին է ընկնում 17-42 տոկոսը:
