Հուլիսի 11-ը Ազգաբնակչության միջազգային օրն է: Ամեն տարի առաջնային խնդիրները հաշվի առնելով՝ ընտրվում է տվյալ տարվա հիմնախնդիր հանդիսացող թեմա: Այս տարին նվիրված էր դեռահասների հղիության հիմնախնդրին:
ՄԱԿ-ի բնակչության հիմնադրամի հայաստանյան գրասենյակի գործադիր ներկայացուցիչ Գարիկ Հայրապետյանն այսօր լրագրողների հետ հանդիպմանը տեղեկացրեց, որ աշխարհում ապրում է մոտ 600 միլիոն դեռահաս աղջիկ, որոնցից 500 միլիոնը՝ զարգացող երկրներում: Մոտավորապես 15-19 տարեկան աղջիկների շրջանում արձանագրվում է տարեկան մոտ 16 միլիոն ծննդաբերություն, ընդ որում՝ յուրաքանչյուր 100 դեպքից երեքը ծննդաբերում է մինչև 15 տարեկանը: Ըստ Գարիկ Հայրապետյանի՝ սա բավականին մեծ ցուցանիշ է:
«Վաղաժամ, անպատրաստ ծննդաբերությունը առաջացնում է առողջական խնդիրներ թե՛ մոր, թե՛ երեխայի և թե՛ հետագա սերնդի մոտ»,- մտահոգություն հայտնեց Գարիկ Հայրապետյանը: Հայաստանում յուրաքանչյուր 1000 հղի կանանցից 28-ը 15-19 տարեկան դեռահասներ են:
ՄԱԿ-ի բնակչության հիմնադրամի հայաստանյան գրասենյակի գործադիր ներկայացուցիչը խոսեց նաև սեռական դաստիարակության անհրաժեշտության մասին և ներկայացրեց համաշխարհային հետազոտության արդյունքները, ըստ որոնց՝ այն երկրները, որտեղ սեռական դաստիարակությունը պատշաճ մակարդակի վրա է, դեռահասության տարիքում հղիությունների թիվը կրճատվում է: Այդպիսի երկրի օրինակ է, ըստ Գարիկ Հայրապետյանի, Անգլիան, ինչը չի կարելի ասել Հայաստանի մասին:
Այս օրվա խորհրդին անդրադառնալով՝ Գարիկ Հայրապետյանը փաստեց. «Հայաստանի վերաբերյալ մեզ մոտ լուրջ ժողովրդագրական խնդիր կա՝ ծերացում, ծնելիության նվազում, միգրացիա: Այս ամենը հանգեցնում են բնակչության թվաքանակի նվազեցման: Սրանք լուրջ մտահոգությունների տեղիք են տալիս»:
Նա նշեց նաև, որ հայերն արդեն դասվում են ծերացող ազգերի շարքին:
