«Անընդդիմություն մնացած իշխանական համակարգը տրվեց ինտրիգներին». այսօր «Առաջին լրատվական»-ի հետ զրույցում ասաց քաղաքական հետազոտությունների «Վերելք» հիմնադրամի ղեկավար, քաղաքական փորձագետ Արծրուն Պեպանյանը՝ խոսելով ՎՊ տարեկան հաշվետվության հրապարակային ներկայացումից հետո իշխանական վերնախավում տեղի ունեցող գործընթացների մասին:
Նա նշեց, որ ՀՀ-ում իշխանության ճյուղերը զրկված են ամենատարրական ինքնուրույնությունից, ու եթե հաշվի առնենք նաև այն, թե մարդու որ տեսակն է բարձրանում իշխանական սանդուղքով, ապա սխալված չենք լինի, եթե որևէ պաշտոնյայի կողմից արված քննադատական կոշտ հայտարարությունների ետևում տեսնենք քաղաքական ինտրիգ: Ուստի, Պեպանյանի կարծիքով, Սերժ Սարգսյանին հենց դա էր վրդովեցրել: Վերլուծաբանը հիշեցրեց նախկինում տված իր հարցազրույցները, որոնցում նշել էր, որ «անընդդիմություն մնացած իշխանական համակարգը տրվելու է ինտրիգներին», ինչը և հաստատվեց այս օրերին:
«Ինտրիգի հասցնող լարվածություն միշտ էլ եղել է, բայց մինչ այժմ կրքերը մասամբ բավարարվում էին քաղաքական գործընթացների ժամանակ: Հիմա չկան այդ գործընթացները, չկա զսպող ընդդիմությունը, մյուս կողմից էլ՝ ծառացած է հաջորդ նախագահի հարցը: Այնպես որ՝ մեզ հետաքրքիր օրեր են սպասվում: Ճիշտ է, Հայաստանը դրանից չի շահի, բայց հանրությունը խոսելու, զբաղվելու նյութ կունենա»,- նման տեսակետ հայտնեց Արծրուն Պեպանյանը:
Վերջինիս դիտարկումներով՝ ամենադժվար նախագահությունը վիճակված է Սերժ Սարգսյանին: Պարզաբանելով՝ նա ասաց, որ նախորդ նախագահները պաշտոնավարման ժամկետի գերակշիռ մասում քաղաքական դաշտի ոչ ընդդիմադիր հատվածում առանձնակի խնդիրներ չեն ունեցել, իսկ ահա Սերժ Սարգսյանը նման խնդիր, այն էլ՝ լուրջ, ունեցել է դեռ մինչ նախագահ դառնալը, ունի նաև այսօր:
«Հենց միայն ԲՀԿ գոյությունը ասվածի վառ ապացույցն է. նախորդ նախագահների օրոք պատկերացնել անգամ հնարավոր չէր, որ մի մեծահարուստ կուսակցություն ստեղծեր, փորձեր դիմակայել նախագահին, դրսերում քննադատեր իշխանություններին: Ու սա ամենևին ժողովրդավարության զարգացման արդյունք չէ. սա, ըստ ամենայնի, արգասիք է ոչ հայաստանյան ուժային կենտրոնների ակտիվ աշխատանքի: Ինձ նման ենթադրության հանգեցնում է այն, որ մեզ նման երկրում անհավանական է քաղաքական դաշտի ոչ ընդդիմադիր հատվածի որևէ ներկայացուցչի դիմակայությունը նախագահին առանց դրսի սատարման»,- մեկնաբանեց Արծրուն Պեպանյանը՝ եզրափակելով, որ քաղաքական դաշտի ոչ ընդդիմադիր հատվածը վերջին տարիներին մոնոլիտ չի եղել և առաջիկայում էլ հազիվ թե լինի:
Ուստի, նրա համոզմամբ, եթե ընդգծված ընդդիմադիր առաջնորդ չհայտնվի, ումից քաղաքական դաշտի ոչ ընդդիմադիր հատվածը երկյուղի, ապա շատ ականներ կպայթեն:
