ԵԱՀԿ գործող նախագահ, Ուկրաինայի արտաքին գործերի նախարար Լեոնիդ Կոժարան այսօր այցելում է Ադրբեջան: Այսօր նախատեսված են Լ. Կոժորայի պաշտոնական հանդիպումներն ու բանակցությունները Ադրբեջանի ղեկավարների հետ՝ քննարկելու թե՛ Լեռնային Ղարաբաղի հակամարտության հետ կապված խնդիրները, թե՛ ԵԱՀԿ-ի հետ Ադրբեջանի համագործակցությանն առնչվող հարցեր:
Նախատեսված էր, որ Լ. Կոժարան Բաքվից պետք է ժամաներ Հայաստան, սակայն, «Առաջին լրատվական»-ի տեղեկությունների համաձայն, Ուկրաինայի արտգործնախարարը Հայաստան չի այցելի, նա միանգամից մեկնելու է Ուկրաինա: Հայաստան չժամանելու պատճառը հայտնի չէ, բայց հիշեցնենք, որ Լ. Կոժարան տարածաշրջանի երեք հանրապետություններ պետք է այցելեր դեռևս հունիսի կեսերին: Այն ժամանակ նա ժամանեց միայն Վրաստան, իսկ Ադրբեջան և Հայաստան այցը հետաձգվեց: Ուկրաինայի ԱԳՆ-ն կամ մամուլը որևէ տեղեկատվություն կամ պարզաբանում չեն տվել այդ մասին, բայց ռուսական լրատվամիջոցներում հրապարակումներ կային, որ ԵԱՀԿ գործող նախագահը «սայթաքել է Ղարաբաղի հարցում»:
Ռուսական մամուլը տեղեկացնում էր, որ Լ. Կոժարան մինչև վերջին պահը պատրաստվում էր այդ այցին: Հայաստանի և Ադրբեջանի նախագահներին հանդիպելու համար նախապես հանդիպել էր ԵԱՀԿ Մինսկի խմբի երեք համանախագահների հետ՝ ծանոթանալու ԼՂ հակամարտության նրբություններին, սակայն հաջորդ օրն այդ այցը տեղի չունեցավ: Ըստ այդ տեղեկությունների՝ Հայաստանի և Ադրբեջանի նախագահները նրա հետ հանդիպելու ժամանակ չէին ունեցել:
Եվ ահա այսօր Լ. Կոժարան ժամանում է Ադրբեջան, բայց Հայաստան չի այցելելու: Հայաստան կայցելի հավանաբար ավելի ուշ: Այս անգամ էլ չի պարզաբանվում, թե Ադրբեջան հասնելուց հետո ինչն է խանգարում նրան ժամանել Հայաստան: Պատճառներից մեկը կարող է լինել թերևս վաղը՝ հուլիսի 9-ին, Ուկրաինայի նախագահ Վիկտոր Յանուկովիչի ծննդյան տարեդարձը, որից հետո Սերժ Սարգսյանը պաշտոնական այցով մեկնելու է Մոլդովա: Ըստ մեր տեղեկությունների՝ ԵԱԿՀ գործող նախագահը Երևան կժամանի հուլիսի 15-ից ոչ շուտ:
