ԱՄՆ միջուկային անվտանգության ազգային վարչությունն արտոնել է արդիականացված B61-12 ատոմային ռումբի արտադրության տեխնոլոգիական նախապատրաստությունը։ Այս մասին հայտնում է TASS գործակալությունը՝ հղում անելով գերատեսչության կայքին։
«Այդ որոշումը նշանավորում է մշակման եզրափակիչ փուլի մեկնարկ, որին կհաջորդի անմիջապես արտադրությունը։ Վարչությունում հաստատում են, որ այդ զենքի առաջին նմուշի պատրաստումը ծրագրված է 2020 ֆինանսական տարում»,- ասվում է տեքստում։
B61 ռումբը գոյություն ունի 4 տարբեր մոդիֆիկացիաների տեսքով (B61-3, -4, -7 և -10)։ Արդիականացման ծրագրի շրջանակում այդ ամենին պետք է փոխարինելու գա մեկը՝ B61-12։ Այն նախորդից կտարբերվի, մասնավորապես, պարաշյուտի բացակայությամբ և նոր պոչային հատվածի առկայությամբ՝ նշանառության իներցիալ համակարգով, որը մեծացնում է կիրառման ճշգրտությունը։ Այդ մշակումները կատարվում են ԱՄՆ նախագահ Բարաք Օբամայի՝ միջուկային ուժերի նորացման քաղաքականության շրջանակում, որի վրա, Պենտագոնի գնահատականներով, առաջիկա 10 տարում կծախսվի 350-450 մլրդ դոլար։
