ԱՄՆ նախագահի հանրապետական թեկնածու Դոնալդ Թրամփը վախ է ներշնչում Բալթյան երկրների մոտ՝ գրում է Financial Times-ը։
Սկզբում Թրամփը հայտարարել էր, որ «ռուսական ագրեսիայի» դեպքում հրաժարվում է երաշխավորել ԱՄՆ պաշտպանությունը Էստոնիային, Լատվիային և Լիտվային։ Այնուհետև մեկ այլ բարձրաստիճան հանրապետական Էստոնիան անվանել էր «Սանկտ Պետերբուրգի արվարձան» և կասկած հայտնել, թե արժե՞ արդյոք, որ ԱՄՆ-ը միջուկային պատերազմի ռիսկի ենթարկվի նման վայրի պատճառով։ Եվ վերջապես՝ Թրամփն ասել է, որ կարող է Ղրիմը ճանաչել ռուսական և չեղարկել պատժամիջոցները։
Տալլինում, Ռիգայում և Վիլնյուսում շատերի համար իրավիճակն այնպիսին է՝ ասես իրականանում են նրանց վատագույն վախերը՝ գրում է պարբերականը։ Մարդը, որը կանգնած է իրենց դաշնակից երկրի առաջնորդ դառնալուց մեկ քայլ հեռավորության վրա, իրենց մեծ թշնամուն աջակցություն ցուցաբերելու ազդանշան է տալիս։
«Դա մղձավանջ է մեզ համար, Եվրոպայի համար, ցանկացած երկրի համար, որն առնչություն ունի ԱՄՆ-ի հետ, այդ ամենը կարող է մղձավանջի վերածվել»,- հայտարարել է Լատվիայի խորհրդարանի արտաքին քաղաքականության հարցերով կոմիտեի ղեկավար Օյարս Կալնինշը։
Պարբերականը ճշմարտության փոքր չափաբաժին է նկատում միլիարդատիրոջ խոսքերում, որ ՆԱՏՕ-ի որոշ երկրներ չեն վճարում որքան պետք է, և Մերձբալթիկան պետք է պաշտպանել միայն այն դեպքում, երբ այն լիովին իրագործի իր պարտականությունները։
