Անցած ամիս լիբիական Սաբրատա քաղաքի ափեր են դուրս նետվել ավելի քան 120 ներգաղթյալների դիեր, ովքեր փորձել են ծովով Աֆրիկայից հասնել Եվրոպա։ Այս մասին հայտնել են տեղի իշխանությունները՝ փոխանցում է TASS գործակալությունը։
Հաղորդվում է, որ Միջերկրական ծովով ապօրինաբար եվրոպական երկրներ ձգտողների շարքում խեղդվողների մարմինները Սաբրատայի ափեր են նետվում ամեն օր։
Անցած շաբաթ տխուր «ռեկորդ» է սահմանվել։ Մեկ օրում փրկարարները ափամերձ ջրերում հայտնաբերել էին 53 ներգաղթյալի դի։
Միգրացիայի միջազգային կազմակերպության վերջին տվյալներով՝ 2016-ի սկզբից Միջերկրական ծովով Եվրոպա է ապօրինաբար ժամանել մոտ 90 հազար մարդ՝ 14 տոկոսով ավելի, քան 2015 թվականի նույն ժամանակահատվածում։
Միջերկրականի ապօրինի հատման փորձերը 2016-ին ավելի քան 3000 մարդու կյանք են խլել։ Դրանք միայն հաստատված տվյալներն են։
