Արմավիրի մարզի ընդհանուր իրավասության դատարանում Արթուր Ադամյանի նախագահությամբ սկսվել է Արմավիրի մարզի Սարդարապատ գյուղի բնակիչներ Ռազմիկ Գրիգորյանի, Արարատ Սարգսյանի և Նժդեհ Ենոքյանի գործի դատավարությունը:
Ըստ մեղադրանքի՝ 30-ամյա Ռազմիկ Գրիգորյանը, 40-ամյա Արարատ Սարգսյանը և 20-ամյա Նժդեհ Ենոքյանը նախնական համաձայնության են եկել և կատարել մարդու առևանգում:
2013 թվականի ապրիլի 26-ին, ժամը 19-ի սահմաններում Սարդարապատ գյուղի միջնակարգ դպրոցի մոտ Գրիգորյանն ու Սարգսյանը Ս.-ի նկատմամբ ֆիզիկական բռնություն գործադրելով և հաղթահարելով աղջկա դիմադրությունը՝ նստեցրել են Արարատ Սարգսյանին պատկանող «Մերսեդես» մակնիշի ավտոմեքենան: Գրիգորյանը, Սարգսյանն ու Ենոքյանը բացահայտ առևանգել են Ս.-ին, տեղափոխել Արմավիրի մարզի Արաքս գյուղում բնակվող Գ. Ե.-ի տուն և առևանգվածի կամքին հակառակ՝ պահել այդ տանը:
Սարդարապատ գյուղի երեք բնակիչներին էլ մեղադրանք է առաջադրվել ՀՀ քրեական օրենսգրքի 131 հոդվածի 2-րդ մասի 1-ին կետով:
Մեղադրյալ եռյակից կալանքի տակ է միայն Ռազմիկ Գրիգորյանը: Արարատ Սարգսյանի ու Նժդեհ Ենոքյանի նկատմամբ որպես խափանման միջոց է կիրառվել չհեռանալու մասին ստորագրությունը:
