Մինչ «4»-ի նախաձեռնությունը այսօր կազմակերպում էր ճգնաժամից ելքերի հարցով քննարկում, իրավիճակն ավելի լարվեց. վիրավորվել է Արայիկ Խանդոյանը (Միայնակ գայլը):
Խոսելով այս լարված վիճակում կատարվելիք կարևոր քայլերի մասին՝ «4»-ի նախաձեռնության անդամ՝ իրավապաշտպան Արթուր Սաքունցն ասաց. «Իշխանությունը մի կողմից՝ հայտարարում է ուժի կիրառման համաչափության մասին, ինչն այդպես չէ, մյուս կողմից՝ շատ մտահոգիչ է «Սասնա ծռերի» հսկողության տակ գտնվող բժիշկների վիճակը: Ես արդարացված չեմ համարում բժիշկներին «Սասնա ծռերի կողմից պահելը»: Սաքունցը տղաներին կոչ արեց բաց թողնել այդ բժիշկներին:
Իրավապաշտպանի խոսքով՝ հակառակ դեպքում կասկածի տակ է դրվում նրանց հերոսականության այն իմիջը, որ կար հանրության մեջ. «Այնպես որ՝ վերջին շրջանում երկու կողմի այդ գործողությունները ամենևին չեն հանգեցնում իրավիճակի լարվածության թուլացման: Իսկ Արայիկ Խանդոյանին վիրավորելու հանգամանքը ցույց է տալիս, որ իշխանությունները չեն հրաժարվել հրազենի կիրառման մեթոդներից»:
Հրապարակախոս Զառա Հովհաննիսյանի համոզմամբ՝ այսքան օրերի ընթացքում շարունակական այս պրոցեսն ի վերջո կառուցողական հիմքերի վրա չդրվեց. «Իսկ այս վերջին դեպքերը ակնհայտորեն պարունակում են երկուստեք բռնության էսկալացիայի տարրեր: Երկուստեք տեղի է ունեցել ձախողում, որը, այսպես թե այնպես, տեղափոխվելու է հանրության գիտակցության մեջ և ևս մեկ անգամ մեծացնելու է ապատիոն տրամադրությունները, ինչը հանգեցնելու է է՛լ ավելի խորը ճգնաժամային իրավիճակի»:
Զառա Հովհաննիսյանը կարծում է, որ խաղացին համայն հայության նուրբ հոգեբանական շերտերի վրա, իսկ բանական հատվածը ընդհանրապես բացակայում է:
Մանրամասները՝ տեսանյութում:
