Եգիպտոսի մայրաքաղաք Կահիրեում Մուհամմադ Մուրսիի կողմնակիցների և զորքերի միջև տեղի ունեցած փոխհրաձգության հետևանքով զոհվել են երեք, վիրավորվել՝ տասնյակ մարդիկ:
Ինչպես հաղորդում է «Գոլոս Ռոսիի» ռադիոկայանը, Կահիրեի Մադինաթ Նասր թաղամասի Ռաբիա Ալ-Ադաուիա մզկիթի մոտ հավաքված Մուրսիի կողմնակիցներն իրենց համախոհներին ուղարկել են հարձակում գործելու հանրապետական գվարդիայի շենքի վրա, որտեղ, ինչպես նրանք են ենթադրում, պահվում է «պետության օրինական ղեկավար» Մուհամմադ Մուրսին:
Զինվորականները ստիպված են եղել կրակ բացել՝ բազմությանը ցրելու համար:
Ավելի վաղ Կահիրեի համալսարանի մոտ մի խումբ իսլամիստներ հարձակում էին գործել ոստիկանական տեղամասի վրա, իրավապահ մարմիններին հաջողվել էր հետ մղել նրանց:
Բացի այդ, հաղորդվում է, որ բանակի և Մուրսիի կողմնակիցների միջև զինված բախումներ են տեղի ունենում Իսմաիլիա քաղաքում՝ Կահիրեից հյուսիս: Դեռևս հայտնի չէ՝ բախումների հետևանքով վիրավորներ կան, թե ոչ:
Դամանհուրում ընդդիմության և իսլամիստների միջև բախումների հետևանքով կան տասնյակ տուժածներ:
