Համաշխարհային ֆինանսական ինստիտուտների կանխատեսումները Եգիպտոսի վերաբերյալ մխիթարցնող չեն, գրում է Էուջենիո Օկկորսիոն La Repubblica թերթում հրատարակված հոդվածում:
«Աշխարհի ամենամեծ՝ Merrill Lynch ներդրումային բանկը Եգիպտոսի համար հաշվել է 6 ամսվա կյանք: Դրանից հետո «արտաքին դիրքորոշումները զգալիորեն կխստանան, իսկ ֆինանսական կարողությունը խիստ ճնշման կենթարկվի»,- ասվում է երեկ հրապարակված հաշվետվության մեջ: Գործնականում Եգիպտոսին սպառնում է մնալ առանց պարտքերի և մատակարարումների համար անհրաժեշտ գումարի: Եվ այդ ամենն ուղղակիորեն կապված է անխուսափելի զբոսաշրջային ճգնաժամի հետ. զբոսաշրջիկների հոսքը այս տարվա առաջին քառորդում նվազել է 17.3 տոկոսով՝ նախորդ տարվա նույն ժամանակաշրջանի հետ համեմատությամբ: 2012թ. զբոսաշրջիկների թիվը սկսել է մոտենալ 12 միլիոնի (2010թ.՝ 14 միլիոն)՝ շնորհիվ Կարմիր ծովի առողջարանների: Ամենասարսափելին այն է, որ եկամուտները կտրուկ նվազել են՝ 2010թ. 46 մլրդ դոլարից 2012թ. հասնելով 13 մլրդ-ի: ՀՆԱ-ն նվազել է մինչև 4 տոկոս:
Անկասկած, իրավիճակը հնարավոր է փոխել և բավական արագ, եթե Մանսուրի նոր կառավարությունը կախարդանքի, միասնականության, խաղաղության և վճռականության շնորհիվ դուրս գա ճգնաժամից, գրում է հոդվածագիրը: Սակայն Merrill Lynch-ի առիթ չի թողնում: «Մենք կասկածում ենք, որ այս ընթացքում հնարավոր է իրականացնել վստահության արժանի ֆինասական բարեփոխումներ: Բացի այդ, քիչ հավանական է, որ համաձայնություն ձեռք կբերվի ԱՄՀ-ի հետ»,- ասվում է հաշվետվության մեջ: Իսկ այդ պայմանագիրը Եգիպտոսի համար կենսական կարևոր նշանակություն ունի: 14.5 մլրդ դոլար տրամադրելու վերաբերյալ նախնական պայմանավորվածություն ձեռք էր բերվել դեռ տարվա սկզբին: Պայմանավորվածությունը պետք է իրականացվեր Մուհամմադ Մուրսիի կողմից խոստացված բարեփոխումներն իրականացնելու պայմանով: Դրանից հետո ԱՄՀ-ի կողմից օգնության տրամադրման հարցը սառեցվեց, գրում է հեղինակը:
Ինչպես հայտնի է, սցենարը փոխվել է, և այժմ Կահիրեն հույս ունի որևէ օգնություն ստանալ Էմիրություններից և Սաուդյան Արաբիայից, սակայն ամբողջ խնդիրը ժամկետների մեջ է. երկրի ոսկու պաշարները կրճատվել են՝ 2010թ. 36 մլրդ դոլարից հասնելով 13.5 մլրդ-ի. Եգիպտոսին մինչև տարվա վերջ ֆինանսական ծախսերի համար անհրաժեշտ է 33 մլրդ դոլար, ներառյալ ԱՄՀ-ից ստացած նախկին պարտքերի վերաֆինանսավորումները: Մյուս կողմից Moody’s-ը և S&P-ն իջեցրել են Եգիպտոսի վարկային վարկանիշը մինչև CCC+, եզրափակում է հոդվածագիրը:
