Արդարադատության նախարարությանը անցյալ տարի հատկացվել է 10 մլրդ 863 մլն դրամ, որը կատարվել է 99 տոկոսով:
Արդարադատության նախարար Հրայր Թովմասյանը այսօր ԱԺ-ում 2010թ. բյուջեի կատարողականը ներկայացնելով, նկատեց, որ հատկացված գումարները մի քանի ուղղություններով են ծախսվել. «Նախորդ տարվա ընթացքում որոշակի գումարներ են նախատեսվել նաև պահուստային ֆոնդից, որոնք հիմնականում ծախսվել են Մարդու իրավունքների եվրոպական դատարանի կողմից կայացված վճիռների պահանջների կատարման նպատակով, ինչպես նաև իրավաբանական անձանց պետական ռեգիստրում մեկ պատուհանի ներդրման և քրեակատարողական հիմնարկների համար` կապված կալանավորների թվի մեծացման հետ»:
Նշենք, որ Եվրոպական դատարանի կայացրած վճիռների պահանջները կատարելու համար Արդարադատության նախարարությունը ծախսել է մոտ 24 մլն դրամ:
Թովմասյանն առանձին անդրադարձավ քրեակատարողական հիմնարկների պահպանման համար նախատեսված գումարների ծախսմանը և նշեց, որ նախատեսված բյուջեն կատարվել է 99,9 տոկոսով: Նա նաև նշեց, որ կառավարության հաջորդ նիստին կքննարկվի Արմավիրի ՔԿՀ-ին գումարներ հատկացնելու հարցը. «Նախատեսվում է, որ Արմավիրի ՔԿՀ-ին կհատկացվի մոտ 21 հազար քմ տարածք»:
Թովմասյանը նաև տեղեկացրեց, որ գալիք տարի նախատեսվում է Արդարադատության նախարարությանը նոր շենք հատկացնել, իսկ ներկայիս շենքը կտրամադրվի ՔԿՀ վարչակազմին, վերջինիս տարածքն էլ օտարելով` հնարավոր կլինի այդ գումարները ևս ուղղել ՔԿՀ-ների կառուցմանը:
Նախարարի խոսքերով, ՔԿՀ-ներում անհրաժեշտ է ձերբազատվել կամերային տիպի խցերից և ունենալ մենախցեր:
