Տնտեսության ցուցանիշները նույնն են՝ 5.3 տոկոս ակտիվությամբ: Արտաքին առևտուրն, ընդհանուր առմամբ, աճի տենդենց ունի, որոշ տեղերում նվազել է ներմուծումը, որն էլ իր պատճառներն ունի: Այս մասին լրագրողների հետ զրույցում տեղեկացրեց Հայաստանի Գործատուների հանրապետական միության նախագահ Գագիկ Մակարյանը: Ըստ նրա՝ դա պայմանավորված է արտագաղթով, սննդամթերքի ինչ-որ քանակ պակաս է ներմուծվում, բայց արտադրության ծավալների աճ է գրանցվել:
«Զբաղվածության տեսակետից մեզ տոկոս կա չնչին նվազում՝ դրական առումով, բայց լիարժեք չի լինի, եթե ասենք, որ զուտ տնտեսական աճի կամ նոր արտադրությունների գործարկման արդյունք է: Դրան նաև նույն հաջողությամբ կարելի է վերագրել արտագաղթի երևույթը: Մարդկանց մի մասը՝ հույսը կտրելով, որ աշխատանք կգտնի, ամիսներ շարունակ մնացել են աշխատանք որոնողի կարգավիճակում, վերջապես որոշել են հեռանալ և դուրս գալ պաշտոնապես գրանցված գործազուրկների ցանկից»,- ասաց Գագիկ Մակարյանը:
Գործազրկության ցուցանիշը փետրվարին 21 տոկոս էր, հիմա՝ 18: Մակարյանի ձևակերպմամբ՝ զբաղվածության արհեստական աճ է գրանցվել: Աշխատավարձերը մասնավոր սեկտորում աճել են, պետականը՝ նվազման տենդենց ունի: Նվազագույն աշխատավարձը հուլիսի մեկից կբարձրանա:
Գործատուների հանրապետական միության նախագահի կարծիքով՝ պետական քաղաքականությունը տնտեսական ինտեգրման առումով պետք է ունենա երկու մոդել: Առաջինը պետք է լինի այն, որ հարևան երկրների հետ մենք որոշակի կոմպլեմենտար առևտրային զարգացման փուլով գնանք: Գագիկ Մակարյանն էական հնարավորություններ է տեսնում Իրանի Հանրապետության հետ, քանի որ ընտրություններն այնտեղ դրական փոփոխություններ են գրանցել, ինչպես նաև՝որոշակի հարաբերությունների զարգացում Վրաստանի հետ:
«Նաև եթե մենք Եվրոպայի ճանապարհը բռնենք, ապա հնարավորություններ կունենանք Թուրքիայի և Ադրբեջանի մասով: Կարող է տարօրինակ թվալ, որ Ադրբեջանը նշում եմ, բայց Եվրամիությունը Ադրբեջանի հետ կապված խնդիրը լուծելու է: Երկու գործոն կա, որ դրան են տանում, 26 թվականից Ադրբեջանում զգալիորեն անկում են ապրելու նավթայի ռեսուրսները, հետևաբար Ադրբեջանի տնտեսությունը պետք է գնա դիվերսիֆիկացիայի, այսինքն՝ նա չի կարող իր ամբողջ տնտեսությունը կառուցել միայն նավթի վրա»,- նկատեց Գագիկ Մակարյանը: Նրա կարծիքով՝ Ադրբեջանը պետք է անպայման գործարկի այլ տիպի արտադրություններ իր տնտեսության վերելքը կամ որոշակի աճն ապահովելու համար:
