Տեղեկատվական անվտանգությունների փորձագետ Սամվել Մարտիրոսյանի մեկնաբանությամբ` ամերիկյան բացահայտումներից հետո սոցցանցերի գաղտնիության մասին խոսել հնարավոր չէ: Ավելին՝ արտահոսքերը միշտ հնարավոր են, քանի որ այսօր պետական պաշտոնյաներն օգտվում են Facebook-ից, Skype-ից ու Gmail-ից.
«Այդ մարդիկ պիտի ինչ-որ կերպ կրթվեն, որովհետև եթե մարդ իրեն թույլ է տալիս «Ֆեյսբուքով» գրել, թե ինչ զենքի տեսակ է իր երկիրը գնել, ապա դա նշանակում է, որ երկրից արդեն տեղեկատվության արտահոսք է եղել»:
Նա ասուլիսի ընթացքում ասաց, որ Հայաստանից ամսական կես մլն մարդ է օգտվում Facebook-ից: Ռուսաստանյան mail.ru-ի ծառայություններից, որտեղ գերակշռում է «Օդնոկլասնիկի»-ն, շուրջ 1 մլն 200 հազար օգտատեր կա: Բնակչության կեսը սոցցանցերում է, և դա ինֆորմացիայի բավականին լուրջ արտահոսքի պատճառ է:
Ասուլիսի մյուս բանախոս, բլոգեր Տիգրան Քոչարյանն էլ հավելեց, որ ժամանակին ավելի խայտառակ վիճակ էր, համացանցում հատկապես երկրի պաշտպանությանը սպառնացող նկարներ կային. «Մի նկար կար` զինվորը նկարված էր բարձունքին, և ներքևում ամբողջ զորամասն էր: Իհարկե, ՊՆ-ն համապատասխան քայլեր ձեռնարկեց, բայց մարդկանց վերջին դասարաններում պետք է բացատրել, թե ինչ վտանգ կա, եթե իր տվյալները հայտնվում են ուրիշի ձեռքում»:
Նրա խոսքով՝ այն մարդիկ, ովքեր կարծում են, թե հետևում են անվտանգությանը, սխալներ ևս թույլ են տալիս. «Մենք չենք ապրում Շվեյցարիայում կամ Ուրուգվայում, մեր յուրաքանչյուր քայլին հետևում են: Պետական պաշտոնյան շատ ուշադիր պետք է լինի, զսպվածություն է պետք այդ ոլորտում: Թիվ մեկ կանոնը հետևյալն է՝ համացանցով շփվել կամ որևէ անձնական հարց քննարկել մարդուն անձամբ ճանաչելուց հետո»:
Բանախոսն ասաց, որ այն անձանց էլփոստերը, ովքեր պետական գաղտնիքի են տիրապետում, պետք է վերահսկվեն` արտահոսքից խուսափելու համար:
