Տավուշի մարզի ընդհանուր իրավասության դատարանում Ռաֆիկ Մելքոնյանի նախագահությամբ ավարտվել է Մուշեղ Դանիելյանի գործի դատավարությունը:
22-ամյա Մուշեղը ՌԴ քաղաքացի է, բայց բնակվում է Տավուշի մարզի Այգեհովիտ գյուղում: Նրա կատարած հանցանքն էլ ձևականորեն կապված է Ռուսաստանի հետ:
Ըստ դատավճռի՝ 2013 թվականի մարտի 14-ին, գիշերվա ժամը 1-ն անց 24 րոպեին Մուշեղն իր բջջային հեռախոսահամարից զանգահարել է «112», իսկ ժամը 1-ն անց 36 րոպեին՝ «911»:
Երիտասարդը գիշերային զանգերով ահազանգել է, որ իր ընկեր Վոլոդյան Ռուսաստանից զանգել ու իրեն տեղյակ է պահել, թե Վոլգոգրադ քաղաքի «Վորոշիլովսկի» առևտրի կենտրոնի 2-րդ հարկում ահաբեկչության ակտ է տեղի ունենալու:
Թե ում է ցանկացել «փրկել» կամ «հարվածի տակ» դնել ահաբեկչության մասին այս սուտ հաղորդումը տալով՝ Մուշեղ Դանիելյանը, ըստ երևույթին, լավ չի պատկերացրել, քանի որ հարվածի տակ է դրել հենց ինքն իրեն:
Ռուսաստանում «նախապատրաստված» ահաբեկչության մասին սուտ հաղորդում տալու համար Մուշեղին մեղադրանք է առաջադրվել հայաստանյան օրենքով՝ ՀՀ քրեական օրենսգրքի 259 հոդվածով:
Մուշեղ Դանիելյանն իրեն մեղավոր է ճանաչել, միջնորդել, որ գործը քննվի արագացված կարգով:
Տավուշի մարզի ընդհանուր իրավասության դատարանը Մուշեղ Դանիելյանին դատապարտել է 200 հազար դրամ տուգանքի:
