Բրիտանական The Economist պարբերականում հրապարակվել է «Կանայք Թուրքիայում» խորագրով հոդվածը, որում, մասնավորապես, ասվում է.
«Այս շաբաթ 13 եվրոպական երկրներ Ստամբուլում ստորագրեցին Կանանց նկատմամբ գործադրվող բռնությունների դեմ պայքարի ԵԽ-ի կոնվենցիան:
ԵԽ-ի անդամ 47 երկրների մի մասում, այդ թվում՝ Թուրքիայում և Ռուսաստանում, կանանց դրությունն առավել ծանր է: Մարդու իրավունքների հետազոտման կազմակերպության նոր զեկույցում նշված է, որ վերջին շրջանում Թուրքիայում կանանց դրությունը էլ ավելի է ծանրացել: 15-ից բարձր տարիք ունեցող կանանց 42 տոկոսը ենթարկվում է ֆիզիկական և սեռական բռնությունների:
2002 թվականին Թուրքիայում իշխանության եկավ էրդողանի գլխավորած չափավոր իսլամիստական «Արդարություն և զարգացում» կուսակցությունը (ԱԶԿ), որը մի շարք բարեփոխումներ իրականացրեց այդ ուղղությամբ: Սակայն այդ օրենքներն ամենուրեք չէ, որ գործում են:
Թուրքիայում դռները փակ են միայնակ, ամուսնալուծված և ապօրինաբար ամուսնացած կանանց առջև: Ոստիկանությունը հաճախ երես է թեքում բռնության ենթարկված կանանցից` դա պատճառաբանելով ընտանեկան միասնության պահպանման անհրաժեշտությամբ:
Վարչապետ էրդողանը շարունակ դեմ է հանդես գալիս ամուսնալուծություններին և կանանց կոչ է անում ունենալ նվազագույնը 3 երեխա:
2010 թվականին գլոբալ գենդերային հավասարակշռության ինդեքսում Թուրքիան 134 երկրների թվում զբաղեցրել է 126-րդ տեղը: Մեկ այլ հետազոտություն ցույց է տվել, որ Թուրքիայում գրել-կարդալ չիմացող կանանց թիվը հասնում է 5.7 միլիոնի:
Ինչ վերաբերում է 550 հոգանոց թուրքական խորհրդարանում կանանց ներգրավվածությանը, ապա այնտեղ կանայք կազմում են 9 տոկոսը` 50 մանդատ: Այս ցուցանիշով Թուրքիան ետ է մնում անգամ մուսուլմանական երկրներ Աֆղանստանից (28 տոկոս) և ԱՄէ-ից (23 տոկոս):
Ակնկալվում է, որ հունիսի 12-ին կայանալիք խորհրդարանական ընտրությունների արդյունքներով կանանց ներգրավվածությունը խորհրդարանում առավել կընդլայնվի:
Սակայն թուրք կանայք չեն հանձնվում, նրանք շարունակ պայքարում են գլխաշորի և այլ սահմանափակումների վերացման համար: Թուրք կանայք դարձել են առավել կազմակերպված»:
Հիշեցնենք, որ մարտի 8-ին ՄԱԿ-ի Բնակչության հիմնադրամը (UNFPA) նշել էր, որ Թուրքիայում օրական սպանվում է մեկ կին, յուրաքանչյուր 10 կանանցից 4-ը ենթարկվում են բռնության, 4 միլիոն կին գրել-կարդալ չգիտի, 1 միլիոն աղջիկ էլ չի հաճախում դպրոց:
Իսկ «Ստամբուլի ֆեմինիստների միություն» հասարակական կազմակերպության 2010 թվականի հետազոտությունում նշված էր, որ 2009 թվականին Թուրքիայում սպանվել է 953 կին, իսկ 36 միլիոն կանանցից 16 միլիոնն էլ իրենց ամուսինների կամ սիրեկանների կողմից պարբերաբար ենթարկվել են բռնությունների։
