Ռուսական RIA Novosti լրատվական գործակալության փոխանցմամբ՝ Ռուսաստանի նախագահի մամլո քարտուղար Դմիտրի Պեսկովը հայտարարել է, որ Թուրքիայի նախագահ Ռեջեփ Էրդողանի ուղարկած նամակում կան ափսոսանքի խոսքեր:
«Նամակում կան և՛ բառեր, որոնք կապված են ափսոսանք հայտնելու հետ, և՛ կա «ներողություն» բառը: Կա թե՛ մեկը, թե՛ մյուսը»,- ասել է նա: Պեսկովի խոսքով՝ Կրեմլի պաշտոնական կայքում հրապարակված նամակի բովանդակությունն ամբողջովին համապատասխանում է թուրքերենին:
«Այնտեղ չկան լեզվաբանական նրբությունները, ես իսկապես մասնագետ եմ, ես իսկապես թուրքագետ եմ: Եվս մեկ անգամ կարդացե՛ք տեքստը: Այն 100 տոկոսով համապատասխանում է թուրքերենին»,- տեղեկացրել է Պեսկովը:
ՌԴ նախագահի մամլո խոսնակը Էրդողանի կողմից Պուտինին նամակ հղելը որակել է որպես շատ կարևոր քայլ՝ ուղղված հարաբերությունների կարգավորմանը, սակայն անհրաժեշտ են նաև այլ քայլեր:
Պեսկովը հայտարարել է, որ խնդիրը չի հաջողվի լուծել մի քանի օրում. «Իսկապես ուղարկվել է Թուրքիայի նախագահ Էրդողանի ուղերձը: Դուք գիտեք, որ ռուսական կողմը և նախագահ Պուտինը շատ հետևողական դիրքորոշում ունի:
Նախագահ Պուտինը քանիցս հայտարարել է, որ ցանկանում է Թուրքիայի և թուրք ժողովրդի հետ պահպանել բարիդրացիական հարաբերություններ, որ դրանք չունեն այլընտրանք, և որ պետք է անհրաժեշտ պայմաններ ստեղծվեն դրանց կարգավորման համար»:
