«Մանչեսթեր Սիթի»-ի նախկին հարձակվող Կառլոս Տևեսը կարող է ազատազրկվել, եթե չենթարկվի դատարանի որոշմանը: Հիշեցնենք` ֆուտբոլիստը պետք է 250 ժամ ուղղիչ աշխատանքներ կատարի:
Daily Mail-ը հայտնում է, որ Տևեսը պատրաստվում է դիմել դատարանին` պատժամիջոցը վերանայելու խնդրանքով, քանի որ ֆուտբոլիստի հավաստմամբ` «Յուվենթուս»-ն ու «Սիթի»-ն պայմանավորվել են նրա տեղափոխության մասին առանց իր ներկայության:
Նշվում է, որ այդ կերպ Տևեսը փորձում է խուսափել պատժից: Սակայն 29-ամյա արգենտինացին զգուշացվել է, որ չի կարող խուսափել ուղղիչ աշխատանքներից և պետք է կատարի այն 12 ամիսների ընթացքում:
«Մենք չենք մեկնաբանում անհատական դեպքերը: Կարգազանցները պետք է պատժվեն և ենթարկվեն դատավճռին: Ցանկացած մարդ, ով չկատարի այն, սանկցիաների կենթարկվի»,- հայտարարել է դատարանի ներկայացուցիչը:
