Ադրբեջանական APA լրատվական գործակալության փոխանցմամբ, ԱՄՆ-ում ադրբեջանական համայնքը սկսել է գրություններ հղել ամերիկյան օրենսդիրներին` կոչ անելով մայիսի 28-ին նշել մուսուլմանական աշխարհում առաջին աշխարհիկ ժողովրդավարության 93-րդ տարեդարձը:
Դրանցում նշված է. «Իր գոյության 23 ամիսների ընթացքում Ադրբեջանի Դեմոկրատական Հանրապետությունը (ԱԴՀ) «ստեղծել» է աշխարհիկ ժողովրդավարական ինստիտուտներ` խորհրդարան և բազմակուսակցական կառավարություն և «հասել» է Ազգերի լիգայի կողմից իր ճանաչմանը:
Բացի այդ, նշվում է, որ 1919 թվականին ընդունվել է ընտրության մասին օրենքը, որով կանայք ընտրություններին մասնակցելու իրավունք ստացան»:
Այսպիսի գրություն ուղարկվել է նաև Օբամային` կոչ անելով մուսուլմանական աշխարհում առաջին աշխարհիկ ժողովրդավարությունը ճանաչել որպես Ադրբեջանի պատմական հաջողություն:
Հիշեցնենք, որ 1918-20 թթ. միջազգային հանրության կողմից չճանաչված ԱԴՀ-ն բազմիցս դիմել էր Ազգերի լիգային` անդամակցելու խնդրանքով, սակայն վերջինս մերժել էր այդ խնդրանքը՝ պատճառաբանելով, որ ԱԴՀ-ն չունի կայուն կառավարություն և իշխանություն երկրի ողջ տարածքում, ինչպես նաև սահմանային վեճեր ունի Վրաստանի ու Հայաստանի հետ: