Իսրայելի կառավարությունը՝ Բենիամին Նեթանյահուի գլխավորությամբ, իր գոյության 100 օրվա ընթացքում շինարարության ոչ մի թույլտվություն չի տվել Հորդանան գետի Արևմտյան ափին: Ինչպես հաղորդում է The Jerusalem Post-ը, այս մասին հայտարարել է կառավարության աղբյուրը ԱՄՆ պետքարտուղար Ջոն Քերիի՝ Իսրայել և Պաղեստին նախատեսված այցի նախաշեմին:
«Մենք ցանկանում ենք վերսկսել բանակցությունները: Հաջողություն ենք մաղթում պետքարտուղարի առաքելությանը, պատրաստ ենք լուրջ բանակցությունների պաղեստինցիների հետ և հույս ունենք, որ պաղեստինյան կողմը նույնպես լրջությամբ կվերաբերվի այդ հարցին»,- ասել է նա:
Հորդանանի Արևմտյան ափին և Արևելյան Երուսաղեմում շինարարության ամբողջական դադարեցումը Պաղեստինի նախագահ Մահմուդ Աբասի վարչակազմի հիմնական պայմաններից մեկն է՝ խաղաղ բանակցությունները վերսկսելու համար: Բացի այդ, նրանք պահանջում են, որպեսզի Իսրայելը ճանաչի 1967թ. սահմանները՝ որպես մեկնարկային կետ տարածքային խնդիրների քննարկման համար:
