ԱՄՆ-ում ավանդական ԶԼՄ-ները շարունակում են վնասներ կրել տպաքանակների նվազման, գովազդից եկամուտների անկման և սոցցանցերի ժողովրդականության աճի ֆոնին: TASS-ի հաղորդմամբ՝ այս մասին ասվում է Pew Research Center հետազոտական կենտրոնի նոր պրոֆիլային զեկույցում, որը տարածվել է չորեքշաբթի Վաշինգտոնում:
Ըստ փաստաթղթի հեղինակների՝ փաստացի գործը հասել է «ամբողջ ոլորտի վերակազմակերպման, որը վերաբերում է լուրերի նույնիսկ այն սպառողներին, որոնք չեն էլ կասկածում տեղի ունեցող տեկտոնական տեղաշարժերի մասին»:
Փաստաթղթի համաձայն՝ թերթային ոլորտի համար ԱՄՆ-ում հաշվետու 2015 թվականը եղել է «ըստ երևույթին, ամենավատը 2008-2009թթ. ռեցեսիայի ժամանակներից»: Օրաթերթերը կորցրել են միջինը 7%-ական տպաքանակ և մոտ 8%-ական գովազդային եկամուտ՝ «ներառյալ ոչ միայն տպագիր, այլև էլեկտրոնային թերթերի վնասները»՝ նշել են մասնագետները:
Զեկույցի հեղինակները նշում են, որ մինչև 30 տարեկան մարդկանց համար լուրերի հիմնական աղբյուրը գնալով ավելի հաճախ դառնում է ոչ թե հեռուստատեսությունը, այլ սոցցանցերը: «Բացի երիտասարդությունից՝ չափահաս ամերիկացիների 62%-ը ներկայում լուրերին ծանոթանում են սոցիալական մեդիայի կայքերից»,- ասվում է զեկույցում:
Ինտերնետ-ԶԼՄ-ների հետ կապված՝ փորձագետները նշում են, որ «արդեն մի քանի տարի պարզ է, որ համացանցի ֆինանսական իրողություններն նպաստավոր չեն լրատվական կազմակերպությունների համար՝ ինչպես ավանդական, այնպես էլ զուտ թվային»:
